കൊച്ചി: ലോക്ഡൗണിന്റെ പശ്ചാത്തലത്തില്‍ പൊതു ഗതാഗതം അനുവദിക്കാത്ത സാഹചര്യത്തില്‍ ഭിന്നശേഷിക്കാര്‍ക്ക് മരുന്ന് വാങ്ങുന്നതിനും പെന്‍ഷന്‍ തുക കൈപ്പറ്റുന്നതിനും മറ്റ് അടിയന്തര സാഹചര്യങ്ങളിലും പ്രത്യേക യാത്ര സൗകര്യം അനുവദിക്കണമെന്ന് ഭിന്നശേഷിക്കാരുടെ ക്ഷേമത്തിനായി ദേശീയതലത്തില്‍ പ്രവര്‍ത്തിക്കുന്ന സംഘടനയായ സക്ഷമ കേന്ദ്ര – സംസ്ഥാന സര്‍ക്കാരുകളോട് ആവശ്യപ്പെട്ടു.
ഓണ്‍ലൈനായി സംഘടിപ്പിച്ച സക്ഷമയുടെ സംസ്ഥാന സമിതിയാണ് ഈ ആവശ്യം ഉന്നയിച്ചത്. സംസ്ഥാനത്തെ വിവിധ ജില്ലാ കമ്മിറ്റികളുടെ നേതൃത്വത്തില്‍ നൂറുകണക്കിന് നിരാലംബരായ ഭിന്നശേഷിക്കാര്‍ക്ക് ഭക്ഷ്യധാന്യ കിറ്റുകള്‍ മരുന്നുകള്‍, സാനിറൈസുകള്‍, മാസ്‌ക്കുകള്‍, നാപ്കിന്‍ മുതലായവയും വിഷുവിനോടനുബന്ധിച്ച് ഭിന്നശേഷിക്കാരായ കുട്ടികള്‍ക്ക് വിഷു കൈനീട്ടവും നല്‍കി.
സാമ്പത്തിക ബുദ്ധിമുട്ട് അനുഭവിക്കുന്ന ഭിന്നശേഷികാര്‍ക്ക് ആവശ്യമായ മരുന്നുകള്‍ എത്തിക്കുന്നതിന് വിവിധ ജില്ലാ കമ്മിറ്റികളെ സംസ്ഥാന സമിതി ചുമതലപ്പെടുത്തി. ലോക്ഡൗണിന് ശേഷം സാധാരണ ജീവിതത്തിലേക്ക് മടങ്ങിവരുന്നതിന് വേണ്ടി ലോട്ടറി കച്ചവടം പോലെ ഉപജീവനമാര്‍ഗ്ഗം നടത്തുന്ന ഭിന്നശേഷിക്കാര്‍ക്ക് അടിയന്തര സാമ്പത്തിക സഹായം നല്‍കാന്‍ സര്‍ക്കാരുകളും സന്നദ്ധ സംഘടനകളും ജനങ്ങളും തയാറാകണമെന്ന് സക്ഷമ സംസ്ഥാന സമിതി അഭ്യര്‍ഥിച്ചു.
കിടപ്പ് രോഗികള്‍ക്കും മറ്റും മുടങ്ങി പോയ ഫിസിയോതെറാപ്പി മുതലായ ചികിത്സകള്‍ ലോക്ഡൗണിന് ശേഷം ആരംഭിക്കുന്നതിനുള്ള നടപടികള്‍ ആരോഗ്യ വകുപ്പും സാമൂഹ്യ സുരക്ഷ മിഷനും കൈകൊള്ളമെന്ന് സക്ഷമ ആവശ്യപ്പെട്ടു. കാര്യക്ഷമമായി പ്രവര്‍ത്തിക്കുന്ന സംസ്ഥാന സര്‍ക്കാര്‍, ആരോഗ്യ പ്രവര്‍ത്തകര്‍, പോലീസ് ഉദ്ദോഗ്യസ്ഥന്മാര്‍, സേവഭാരതി പ്രവര്‍ത്തകര്‍, മറ്റ് സന്നദ്ധ പ്രവര്‍ത്തകര്‍ തുടങ്ങിയവരേയും സക്ഷമ സംസ്ഥാന സമിതി പ്രശംസിച്ചു.
ഭിന്നശേഷികാര്‍ക്കായി പ്രത്യേക പെന്‍ഷന്‍ അനുവദിച്ച കേന്ദ്ര സര്‍ക്കാരിനോടും നന്ദി പറഞ്ഞു. പ്രധാനമന്ത്രിയുടെ കൊറോണ ദുരിതാശ്വാസ ഫണ്ടിലേക്ക് സംഭാവന നല്‍കാനും സംസ്ഥാന സമിതി തീരുമാനിച്ചു. സംസ്ഥാന അധ്യക്ഷന്‍ ഡോ. എന്‍.ആര്‍. മേനോന്‍, ജനറല്‍ സെക്രട്ടറി ടി.എം. കൃഷ്ണകുമാര്‍, ഓര്‍ഗനൈസിംങ്ങ് സെക്രട്ടറി വി.വി. പ്രദീപ് കുമാര്‍, ജോയിന്റ് ഓര്‍ഗനൈസിങ് സെക്രട്ടറി പി. സുഭാഷ് എന്നിവര്‍ നേതൃത്വം നല്‍കി.
പ്രതികരിക്കാൻ ഇവിടെ എഴുതുക: