കൊല്ലം: കൊറോണ ലക്ഷണങ്ങള് 14 ദിവസത്തിന് ശേഷവും പ്രത്യക്ഷപ്പെടുന്നുണ്ടെന്നും വൈറസ് ഷെഡിങ് കാലയളവില് രോഗ പകര്ച്ച സാധ്യത കുറവാണെന്നും വിദഗ്ധര്.
കൊറോണ വൈറസ് ശരീരത്തില് പ്രവേശിച്ച് കഴിഞ്ഞാല് രോഗബാധ ഉണ്ടായി രോഗലക്ഷണങ്ങള് പ്രകടിപ്പിക്കാനെടുക്കുന്ന സമയപരിധിയാണ് ഇന്കുബേഷന് പിരീഡ്. സാധാരണ ഗതിയില് ഈ സമയ പരിധി 14 ദിവസമാണ്. എന്നാല്, എല്ലാവരിലും ഇങ്ങനെ തന്നെ ആകണമെന്നില്ല. ചിലരില് രണ്ടാഴ്ചക്ക് അപ്പുറത്തേക്ക് ഇത് നീളാം. രോഗലക്ഷണങ്ങള് കാണിക്കാത്തവര്ക്കും സംസ്ഥാനത്ത് രോഗം സ്ഥിരീകരിച്ചിട്ടുണ്ട്. ഇവരില് ചിലര്ക്ക് ചികിത്സ തുടങ്ങിയാലും 39 ദിവസം വരെ വൈറസ് സാന്നിധ്യം കണ്ടെത്തിയിട്ടുണ്ട്. എന്നാല്, ഈ കാലയളവില് ഈ രോഗിയില് നിന്ന് മറ്റൊരാളിലേക്ക് രോഗം പകരണമെന്നില്ല. തൃശൂര്, കാസര്കോട് ജില്ലകളില് ആദ്യം രോഗം സ്ഥിരീകരിച്ച രോഗികള്ക്ക് ഇത്തരം അവസ്ഥ ഉണ്ടായിരുന്നു.
കേരളത്തില് രോഗബാധ സ്ഥിരീകരിച്ച 80 ശതമാനം പേര്ക്കും ചെറിയ രോഗ ലക്ഷണങ്ങള് മാത്രമാണ് ഉണ്ടായിരുന്നത്. 20 മുതല് 30 ശതമാനം പേര്ക്ക് ഒരു രോഗലക്ഷണവും ഉണ്ടായിരുന്നില്ല. അതേസമയം, യാത്രകള് ചെയ്യാത്ത, രോഗികളുമായി സമ്പര്ക്കം വരാത്ത എന്നാല് കൊവിഡിന്റെ അതേ ലക്ഷണങ്ങള് ഉള്ളവരെ കൂടി കേരളത്തില് പരിശോധിക്കും.
