കാസര്കോട്: ഹിന്ദു സമൂഹത്തെ സംബന്ധിച്ചിടത്തോളം പുതുവര്ഷപ്പിറവിയായ മേടമാസത്തിലെ വിഷു ഏറ്റവും വലിയൊരു ആഘോഷ ദിനമാണ്. ലോകം മുഴുവന് കൊറോണ മാഹാമാരിയുടെ പിടിയിലമര്ന്നതോടെ വിഷുആഘോഷങ്ങള് മാറ്റിവെച്ച് സമൂഹനന്മയ്ക്കായി പ്രാര്ത്ഥിക്കുകയാണ് ഹിന്ദുസമൂഹം. കാര്ഷിക സംസ്കാരത്തിന്റെ ഉത്സവം കൂടിയാണ് വിഷു. കണിവെള്ളരിയും കണിക്കലങ്ങളും പുത്തനുടുപ്പും മുതല് കണ്ണഞ്ചിപ്പിക്കുന്ന ആകാശത്ത് വര്ണ്ണ വിസ്മയങ്ങള് തീര്ക്കുന്ന പടക്കങ്ങളുടെ വരെ വന് കച്ചവടം കൂടിയാണ് വിഷുകാല വിപണിയില് നടക്കാറ്. വിളവെടുക്കാറായ പച്ചക്കറികള് എന്തുചെയ്യണമെന്നറിയാതെ ബുദ്ധിമുട്ടിലായിരിക്കുകയാണ് കര്ഷകര്.
കോവിഡ് 19 പ്രതിരോധത്തിന്റെ ഭാഗമായി ലോക്ഡൗണ് പ്രഖ്യാപിച്ചതോടെ ഇത്തവണത്തെ വിഷു വിപണി നഷ്ടമായ മണ്പാത്ര നിര്മാണ തൊഴിലാളികള് കടുത്ത പ്രതിസന്ധിയില്. പല വീടുകളിലും വിഷുവിപണി ലക്ഷ്യമാക്കി തയാറാക്കിയ മണ്പാത്രങ്ങള് കെട്ടിക്കിടക്കുകയാണ്. കാസര്കോട് ഒരു ലക്ഷത്തോളം കണിക്കലങ്ങള് ഇത്തവണ വിഷുവിപണി പ്രതീക്ഷിച്ചു നിര്മിച്ചതായാണു കണക്ക്. ഇതില് ഏറ്റവും കൂടുതല് കലങ്ങള് കെട്ടിക്കിടക്കുന്നതു മടിക്കൈ എരിക്കുളത്താണ്. കൂടാതെ പൈക്ക, പെരിയ, കീക്കാനം, ബേളന്തടുക്കം തുടങ്ങിയ സ്ഥലങ്ങളിലും മണ്പാത്രങ്ങള് സ്റ്റോക്കുണ്ട്.
കാഞ്ഞങ്ങാട്, നീലേശ്വരം, ചെറുവത്തൂര്, തൃക്കരിപ്പൂര്, മാവുങ്കാല്, പാലക്കുന്ന്, ഉദുമ, കാസര്കോട്, പൊയിനാച്ചി തുടങ്ങി ജില്ലയിലെ പ്രധാന കേന്ദ്രങ്ങളിലാണു കണിക്കല വിപണി. കൂടാതെ തലച്ചുമടായി കിലോമീറ്ററുകള് നടന്നു വീടുകളിലെത്തിച്ചും കണിക്കലങ്ങള് വില്പന നടത്തുന്നു. ഇവ രണ്ടും സാധ്യമല്ലാതായതോടെ കടക്കെണിയിലാണു തൊഴിലാളികള്.
വിഷുവിപണിയില്ലാതായതോടെ പ്രതിസന്ധിയിലായ മണ്പാത്ര നിര്മാണ തൊഴിലാളികളില് നിന്നു പാത്രങ്ങള് കേരള കളിമണ്പാത്ര നിര്മാണ വിപണനക്ഷേമ വികസന കോര്പറേഷനിലൂടെ സംഭരിക്കണമെന്നും തൊഴിലാളികള്ക്ക് അസംസ്കൃത സാധനങ്ങള് ശേഖരിക്കാന് കോര്പറേഷന് മുഖേന ധനസഹായം നല്കണമെന്നുമുള്ള ആവശ്യവും ശക്തമായിട്ടുണ്ട്. കോവിഡ് പ്രതിരോധത്തിന്റ ഭാഗമായി എന്തും സഹിച്ചും മഹാമാരിയെ ഒറ്റക്കെട്ടായി ചെറുക്കുമെന്ന ദൃഡനിശ്ചയത്തിലാണ് ഹിന്ദുസമൂഹം. ഭക്തര്ക്ക് പ്രവേശനമില്ലെങ്കിലും ആഘോഷപ്പൊലിമകളില്ലാതെ ആചാരാനുഷ്ഠാനങ്ങളില് മാത്രമായി വിഷുകണി ദര്ശനവും വിഷുസദ്യയുമൊരുക്കി മേടപ്പുലരിയെ വരവേല്ക്കാനായി ക്ഷേത്രങ്ങളൊരുങ്ങി കഴിഞ്ഞു. ലഭ്യമായ പ്രാദേശിക വിഭവങ്ങള് കൊണ്ട് ഹൈന്ദവ ഭവനങ്ങളും വിഷുപ്പുലരിയെ വരവേല്ക്കാനുള്ള ഒരുക്കത്തിലാണ്.
