ന്യൂദല്ഹി: രാജ്യവ്യാപകമായി മത്സ്യബന്ധന-വിതരണ മേഖലയെ ലോക്ക് ഡൗണില് നിന്ന് ഒഴിവാക്കി ആഭ്യന്തരമന്ത്രാലയ ഉത്തരവിറക്കി.എല്ലാ സംസ്ഥാനങ്ങളിലേയും കേന്ദ്ര ഭരണപ്രദേശങ്ങളിലേയും ചീഫ് സെക്രട്ടറിമാരുമായി ചര്ച്ച ചെയ്ത ശേഷം കേന്ദ്ര ആഭ്യന്തര സെക്രട്ടറി അജയ് ഭല്ലയാണ് ഇക്കാര്യത്തില് തീരുമാനമെടുത്തത്.
കടലിലെ മീന്പിടിത്തം, മത്സ്യം, ചെമ്മീന് തുടങ്ങിയവയുടെ കടത്ത്, മത്സ്യക്കൃഷി, അതുമായി ബന്ധപ്പെട്ട പ്രവര്ത്തനങ്ങള്, പാക്കേജിങ്, ശീതീകരണം, വിപണനം, ഹാച്ചറികള്, ഫീഡ് പ്ലാന്റുകള്, അക്വേറിയം മുതലായവയ്ക്കും ഇവയുമായി ബന്ധപ്പെട്ട് പ്രവര്ത്തിക്കുന്നവര്ക്കുമാണ് ഇളവ് ബാധകമാക്കിയിരിക്കുന്നത്.
അതേ സമയം സാമൂഹിക അകലം പാലിക്കണമെന്നും നിര്ദേശമുണ്ട്. കാര്ഷിക പ്രവര്ത്തനങ്ങള്ക്കും ലോക്ക്ഡൗണില് നിന്ന് സര്ക്കാര് ഇളവ് നല്കിയിട്ടുണ്ട്. വിളവെടുപ്പും വിതയ്ക്കലുമടക്കം കാര്ഷികപ്രവര്ത്തനങ്ങള് സുഗമമായി നടക്കുന്നുണ്ടെന്ന് ഉറപ്പാക്കാനും കേന്ദ്ര സര്ക്കാര് സംസ്ഥാനങ്ങളോട് നിര്ദേശിച്ചിട്ടുണ്ട്.
