ന്യൂദല്ഹി : രാജ്യത്ത് ലോക്ഡൗണ് പ്രഖ്യാപിച്ച സാഹചര്യത്തില് അവശ്യ വസ്തുക്കളുടെ ലഭ്യത ഉറപ്പാക്കണമെന്ന് കേന്ദ്ര സര്ക്കാര്. കോവിഡ് വ്യാപിക്കാന് തുടങ്ങിയതോടെ ഇതിനെ പ്രതിരോധിക്കുന്നതിനായാണ് ലോക്ഡൗണ് ഏര്പ്പെടുത്തിയത്. ജനങ്ങള്ക്ക് ഈ കാലയളവില് യാതൊരു വിധത്തിലുള്ള ബുദ്ധിമുട്ടും ഉണ്ടാകരുതെന്നും നിര്ദ്ദേശം നല്കിയിട്ടുണ്ട്.
ഇതുസംബന്ധിച്ച് സംസ്ഥാന ചീഫ് സെക്രട്ടറിമാര്ക്ക് കേന്ദ്രആഭ്യന്തരമന്ത്രാലയ സെക്രട്ടറി അജയ് കുമാര് ഭല്ല കത്തയച്ചു. 1955 ലെ അവശ്യവസ്തു നിയമപ്രകാരമുള്ള നടപടി സ്വീകരിക്കാനാണ് കത്തില് നിര്ദേശിച്ചിരിക്കുന്നത്. അവശ്യവസ്തുക്കളുടെ സംഭരണപരിധി, വിലനിയന്ത്രണം, ഉത്പ്പാദനവര്ധന, വ്യാപാരികളുടെ കണക്ക് പരിശോധന എന്നിവ സംസ്ഥാനങ്ങള് ഉറപ്പ് വരുത്തണം.
നിലവിലെ സാഹചര്യത്തില് തൊഴിലാളികളുടെ ലഭ്യതക്കുറവുണ്ട്. അതുകൊണ്ടുതന്നെ അവശ്യവസ്തുക്കളുടെ ഉല്പ്പാദത്തിലും കുറവ് വന്നിട്ടുണ്ട്. ഇത് ചൂണ്ടിക്കാട്ടി സാധനങ്ങള് പൂഴ്ത്തിവെക്കാനും അമിതലാഭത്തിന് വേണ്ടി വിലകൂട്ടി വില്ക്കാനുള്ള ശ്രമങ്ങള് തടയണമെന്നും കേന്ദ്രം നിര്ദ്ദേശിച്ചിട്ടുണ്ട്.
സാധാരണക്കാരില് നിന്നും അമിത വില ഈടാക്കുന്നത് തടഞ്ഞ് ന്യായ വിലയ്ക്ക് സാധനങ്ങള് ലഭ്യമാക്കണമെന്നും സംസ്ഥാനങ്ങളോട് ആവശ്യപ്പെട്ടിട്ടുണ്ട്. ദുരന്തനിവാരണ നിയമപ്രകാരം കേന്ദ്ര ആഭ്യന്തര മന്ത്രാലയം ഭക്ഷ്യവസ്തുക്കള്, മരുന്നുകള്, മെഡിക്കല് ഉപകരണങ്ങള് എന്നിവയും ഉത്പ്പാദനം പുനരാരംഭിക്കുന്നതിനും ഇവയുടെ കൈമാറ്റത്തിനും സംസ്ഥാനങ്ങള്ക്ക് ഇതിനോടകം അനുമതി നല്കിയിട്ടുണ്ട്.
അവശ്യവസ്തു നിയമത്തിന്റെ ലംഘനം നടത്തുന്ന വ്യാപാരികള് ഉള്പ്പെടെയുള്ളവര്ക്ക് ഏഴ് വര്ഷം വരെ തടവോ പിഴയോ അല്ലെങ്കില് രണ്ടും കൂടിയോ ലഭിക്കും. 1980 ലെ കരിഞ്ചന്ത തടയലും അവശ്യവസ്തുവിതരണം സുഗമമാക്കലും നിയമപ്രകാരം സംസ്ഥാനങ്ങള്ക്ക് ഇത്തരക്കാരെ അറസ്റ്റ് ചെയ്ത് തടവിലാക്കാനും അധികാരമുണ്ട്.
