കൊറോണയെ പ്രതിരോധിക്കാനുള്ള മരുന്നിന്റെ കയറ്റുമതി; അമേരിക്ക ഇന്ത്യയെ ഭീഷണിപ്പെടുത്തിയെന്ന വാര്‍ത്ത വളച്ചൊടിച്ചതെന്ന് തെളിയുന്നു

ന്യൂദല്‍ഹി: കൊറോണ(കൊവിഡ് 19) വൈറസിനെ പ്രതിരോധിക്കാനുള്ള ഹൈഡ്രോക്‌സി ക്‌ളോറോക്വിന്‍ എന്ന മരുന്നിന്റെ കയറ്റുമതിയുമായി ബന്ധപ്പെട്ട് ഇന്ത്യയെ അമേരിക്ക ഭീഷണിപ്പെടുത്തിയെന്ന വാര്‍ത്ത വളച്ചൊടിച്ചതെന്ന് തെളിയുന്നു

അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ പരമാര്‍ശങ്ങള്‍ ചില മാധ്യമങ്ങള്‍ തെറ്റായി വ്യാഖ്യനിക്കുകയും പ്രചരിപ്പിക്കുകയുമായിരുന്നു. എന്നാല്‍ മരുന്നിന്റെ കയറ്റുമതി സംബന്ധിച്ച് അത്തരമൊരു തീരുമാനം കൈക്കൊണ്ടതായി കരുതുന്നില്ലെന്നാണ് ട്രംപ് വ്യക്തമാക്കിയത്. മറ്റു രാജ്യങ്ങളിലേക്കുള്ള കയറ്റുമതി നിര്‍ത്തിവച്ചിരുന്നെന്ന് അറിയാം. താന്‍ കഴിഞ്ഞ ദിവസവും മോദിയുമായി സംസാരിച്ചിരുന്നു. വളരെ നല്ല രീതിയിലായിരുന്നു ചര്‍ച്ചയെന്നും അദ്ദേഹം പറഞ്ഞു. ഇന്ത്യ അമേരിക്കയുമായി മികച്ച രീതിയില്‍ സഹകരിക്കുന്ന രാജ്യമാണ്. കഴിഞ്ഞ കുറേ വര്‍ഷങ്ങളായി ഇന്ത്യയും അമേരിക്കയും വാണിജ്യ രംഗത്ത് പരസ്പരം സഹകരിച്ച് പ്രവര്‍ത്തിക്കുന്നു. ഇത്തരമൊരു തീരുമാനം മോദിയുടേതാണെങ്കില്‍ അദ്ദേഹം തന്നോട് അത് പങ്കുവയ്‌ക്കുമായിരുന്നെന്നും ട്രംപ് പറയുന്നു.

ഒരു മാദ്ധ്യമ പ്രവര്‍ത്തകന്റെ ചോദ്യത്തിനുള്ള മറുപടിയായാണ് ട്രംപ് ഈ കാര്യങ്ങള്‍ വ്യക്തമാക്കിയത്. എന്നാല്‍ അദ്ദേഹത്തിന്റെ വാക്കുകളെ ചില മാദ്ധ്യമങ്ങള്‍ ഇന്ത്യയോടുള്ള ഭീഷണിയായി ചിത്രീകരിക്കുകയായിരുന്നു. തന്റെ സ്വതസിദ്ധമായ ശൈലിയിലുള്ള ട്രംപിന്റെ ഒരു പ്രതികരണത്തെയാണ് ഇന്ത്യയോടും പ്രധാനമന്ത്രി നരേന്ദ്ര മോദിയോടുമുള്ള വെല്ലുവിളിയായി ചിലര്‍ ചിത്രീകരിച്ചത്.

അതേസമയം, രോഗബാധ രൂക്ഷമായ രാജ്യങ്ങളിലേക്ക് ഇന്ത്യ ആവശ്യമായ മരുന്നുകളും മറ്റും കയറ്റി അയക്കുമെന്ന് നേരത്തെ തന്നെ അറിയിച്ചിരുന്നു.