ഇടുക്കി: സംസ്ഥാനത്ത് വേനല്മഴ 10 വരെ തുടരുമെന്ന് കേന്ദ്ര അന്തരീക്ഷ ശാസ്ത്ര കേന്ദ്രം. മധ്യ-തെക്കന് ജില്ലകളിലെ ചിലയിടങ്ങളില് ഇടിമിന്നലോടുകൂടിയ ശക്തമായ മഴയ്ക്കൊപ്പം 30-40 വരെ കിലോ മീറ്റര് വേഗത്തില് കാറ്റ് വീശുന്നതിനും സാധ്യതയുണ്ട്.
ഇന്നും നാളെയും സംസ്ഥാനത്തെല്ലായിടക്കും മഴയ്ക്ക് സാധ്യത പറയുന്നുണ്ട്. അതേ സമയം 9, 10 തിയതികളില് വടക്കന് കേരളത്തില് മഴ കുറയും. കേരള-ലക്ഷദ്വീപ്തീരമേഖലകളിലും മഴയ്ക്ക് സാധ്യതയുണ്ട്. തിങ്കളാഴ്ച ഏറ്റവും അധികം മഴ ലഭിച്ചത് ആലപ്പുഴ ജില്ലയിലെ മാങ്കോമ്പ്, കോഴിക്കോട് ജില്ലയിലെ കൊയിലാണ്ടി എന്നിവിടങ്ങളിലാണ്.
ആറ് സെമീ വീതം. തിരുവനന്തപുരം സിറ്റി, കോഴ (കോട്ടയം) എന്നിവിടങ്ങളില് 5 സെമീറ്ററും കാഞ്ഞിരപ്പിള്ളി, മൂന്നാര്, അമ്പലവയല് (വയനാട്) എന്നിവിടങ്ങളില് നാല് സെമീ വീതവും മഴ പെയ്തു. വടക്കന് ജില്ലകളെ അപേക്ഷിച്ച് മഴകൂടിയത് മധ്യ-തെക്കന് ജില്ലകളിലായിരുന്നു. പാലക്കാടാണ് ഏറ്റവും കൂടിയ താപനില രേഖപ്പെടുത്തിയത് 39 ഡിഗ്രി സെല്ഷ്യസ്. പതിവ് വേനല്മഴയില് നിന്ന് മാറി മഴ പെയ്യുന്നത് ഉച്ചയ്ക്ക് രണ്ട് മണി മുതല് രാത്രി വൈകി വരെയും ആകാം. ചിലയിടങ്ങളില് ചാറ്റല്മഴയായി മണിക്കൂറുകള് നീണ്ട് നില്ക്കും.
