ബാഴ്സലോണ: ഫുട്ബോളിന്റെ ചരിത്രത്തിലെ ഏറ്റവും മികച്ച കളിക്കാരന് അര്ജന്റീനയുടെ ലയണല് മെസിയാണെന്ന് ബാഴ്സലോണയുടെ ഇതിഹാസ താരം സാവി. ക്രിസ്റ്റിയനോ റൊണാള്ഡോയും ബ്രസീലിന്റെ റൊണാള്ഡീഞ്ഞോയുമാണ് തൊട്ടുപിന്നില്.
ചരിത്രത്തിലെ ഏറ്റവും മികച്ച കളിക്കാരന് മെസി തന്നെ. പോര്ച്ചുഗീസ് സ്ട്രൈക്കര് ക്രിസ്റ്റിയനോ റൊണാള്ഡോയും ബ്രസീലിന്റെ ഇതിഹാസ താരം റൊണാള്ഡീഞ്ഞോയും മികച്ച കളിക്കാരാണ്, ഗ്ലോബോ ഇസ്പോര്ട്ടിന് നല്കിയ അഭിമുഖത്തില് ബാഴ്സലോണയുടെ മുന് താരമായ സാവി പറഞ്ഞു.
ലയണല് മെസി ബാഴ്സലോണയിലെത്തുന്നതിന് മുമ്പ് റൊണാള്ഡീഞ്ഞോയായിരുന്നു ബാഴ്സയുടെ സൂപ്പര് സ്റ്റാര്. പക്ഷെ റൊണാള്ഡീഞ്ഞോ കത്തിനിന്ന സമയങ്ങളില് സ്ഥിരത നഷ്ടപ്പെടുക പതിവായിരുന്നു. എന്നാല് മെസിക്ക് ഇങ്ങനെയൊരു അവസ്ഥ ഇതുവരെ ഉണ്ടായിട്ടില്ലെന്ന് മുന് സ്പാനിഷ് രാജ്യാന്തര താരമായ സാവി വ്യക്തമാക്കി.
നിലവില് ഖത്തറിലെ അല് സാദ് ക്ലബ്ബിന്റെ പരിശീലകനാണ് സാവി. കൊറോണയെ പ്രതിരോധിക്കാന് സാവി കറ്റാലന് സിറ്റി ആശുപത്രിക്ക് 1.08 ഡോളര് സംഭാവന നല്കി. കൊറോണ വ്യാപനത്തിന്റെ പശ്ചാത്തലത്തില് മെസി അടക്കമുള്ള ബാഴ്സ താരങ്ങളുടെ പ്രതിഫലത്തിന്റെ എഴുപത് ശതമാനം കുറച്ചിട്ടുണ്ട്.
