കോട്ടയം: മരുന്ന് തീര്‍ന്ന ദമ്പതികള്‍ക്ക് മരുന്നെത്തിച്ച് നല്‍കി പീരുമേട് അഗ്നരക്ഷാ സേന സ്റ്റേഷന്‍ ഓഫീസര്‍ സുവികുമാറും സംഘവും. പീരുമേട് സ്വദേശികളായ ജോസഫ് തോമസ്, സിറ്റി ജോസഫ് ദമ്പതികള്‍ക്കാണ് സുവികുമാറും സംഘവും മരുന്ന് എത്തിച്ചു നല്‍കിയത്.
രണ്ടുപേരും വിവിധ രോഗങ്ങള്‍ക്ക് സ്ഥിരമായി മരുന്നു കഴിക്കുന്നവരാണ്. സമ്പൂര്‍ണ്ണ അടച്ചിടല്‍ പ്രഖ്യാപിച്ചതോടെ പുറത്തുപോയി മുന്നുവാങ്ങാന്‍ കഴിയില്ല. തിരുവല്ല ബ്രദേഴ്‌സ് മെഡിക്കല്‍ ഷോപ്പില്‍ നിന്നാണ് ഇവര്‍ സ്ഥിരമായി മരുന്നുവാങ്ങുന്നത്. മരുന്ന് തീര്‍ന്ന വിവരം അറിഞ്ഞ സുവികുമാര്‍ ഇവരെ സഹായിക്കാമെന്നും മരുന്ന് എത്തിച്ചുതരാമെന്നും അറിയിച്ചു.
ആവശ്യമായ മരുന്നുകള്‍ മെഡിക്കല്‍ ഷോപ്പില്‍ വിളിച്ചുപറഞ്ഞ് എടുത്തുവച്ചു. തിരുവല്ലയിലെ സ്റ്റേഷന്‍ ഓഫീസര്‍ പോള്‍സണ്‍ ജോസഫ് മെഡിക്കല്‍ ഷോപ്പില്‍ നിന്നും മരുന്നുവാങ്ങി. കാഞ്ഞിരപ്പള്ളി അഗ്നിരക്ഷാ സേനയില്‍ ജോലിചെയ്യുന്ന പാമ്പാടി സ്വദേശി ടി.എന്‍.പ്രസാദ് തിരുവല്ലയില്‍ നിന്നും മരുന്ന് കാഞ്ഞിരപ്പള്ളിയില്‍ എത്തിച്ചു. സുവികുമാറും സംഘവും കാഞ്ഞിരപ്പള്ളിയില്‍ നിന്നും കഴിഞ്ഞ ശനിയാഴ്ച വൈകുന്നേരം 6 മണിയോടെ മരുന്ന് ഇവരുടെ വീട്ടില്‍ എത്തിച്ചു നല്‍കി.
പ്രതികരിക്കാൻ ഇവിടെ എഴുതുക: