കണ്ണൂർ: കണ്ണൂർ സെൻട്രൽ ജയിലിൽ നിന്നും മോഷണക്കേസ് പ്രതി രക്ഷപ്പെട്ട സംഭവത്തിൽ ഗുരുതര വീഴ്ചയുണ്ടായെന്ന് അന്വേഷണ റിപ്പോർട്ട്. സെൻട്രൽ ജയിലിൽ തുടർച്ചയായി സുരക്ഷാ വീഴ്ചകളുണ്ടാകുന്ന പശ്ചാത്തലത്തിൽ ജയിൽ ഉദ്യോഗസ്ഥർക്കെതിരെ അടിയന്തിര നടപടിയുണ്ടാകുമെന്ന് സൂചന.
ഡിഐജി എം.കെ.വിനോദ് കുമാറാണ് ഇതു സംബന്ധിച്ച് അന്വേഷണ റിപ്പോർട്ട് കഴിഞ്ഞ ദിവസം സംസ്ഥാന ജയിൽ വകുപ്പ് ഡിഐജിയുടെ നിർദ്ദേശ പ്രകാരം തയ്യാറാക്കിയത്. കാസർകോട്ടെ ബാങ്ക് കവർച്ചാ കേസിലെ റിമാൻഡ് പ്രതി യു.പി. സ്വദേശി അജയ്ബാബു (21)വാണ് വെള്ളിയാഴ്ച പുലർച്ചെ ജയിലിലെ ഐസൊലേഷൻ വാർഡിൽ നിന്ന് രക്ഷപ്പെട്ടത്.ഇയാളെ അന്നു രാത്രി ഏഴുമണിയോടെ തന്നെ കണ്ണപുരത്ത് നിന്ന് പൊലീസ് പിടികൂടിയിരുന്നു.
ഐസൊലേഷൻ വാർഡിൽ മറ്റ് നാല് പ്രതികളെ കൂടി പാർപ്പിച്ചിട്ടുണ്ടെങ്കിലും ഓരോരുത്തരും വെവ്വേറെ മുറികളിലായതിനാൽ തടവുകാരാരും സംഭവമറിഞ്ഞില്ല. താത്ക്കാലിക വാർഡർമാരായിരുന്നു ആ സമയത്ത് ഡ്യൂട്ടിയിലുണ്ടായത്. എന്നാൽ രാവിലെ പഴയ ക്വാറന്റൈൻ ബ്ളോക്കിലെ ഇരുമ്പ് വാതിൽ കുത്തിത്തുറന്ന നിലയിലും ഇയാളെ പാർപ്പിച്ച മുറിയുടെ വെന്റിലേഷൻ ഇളക്കിമാറ്റിയതും കണ്ടാണ് പ്രതി രക്ഷപെട്ടതായി അറിയുന്നത്.
ജയിൽ ചാടിയ തടവുകാരൻ സിസിടിവി ക്യാമറയുടെ പശ്ചാത്തലമുള്ള സ്പെഷ്യൽ സബ് ജയിലിലേക്ക് മാറ്റിയിട്ടുണ്ട്. റിപ്പോർട്ട് ഉടൻ ജയിൽ ഐജിക്ക് കൈമാറുമെന്നറിയുന്നു’. ഒരു മാസം മുൻപ് ജയിലിൽ പീഢന കേസിലെ പ്രതികളിലൊരാൾ ആത്മഹത്യ ചെയ്തിരുന്നു. ഇതിനു ശേഷം ജില്ലാ ആശുപത്രിയിൽ ചികിത്സക്കെത്തിച്ച തടവുകാരനും രക്ഷപ്പെട്ടിരുന്നു. ഇതെല്ലാം ജയിൽ സംവിധാനത്തിന്റെ പോരായ്മയായിട്ടാണ് കരുതുന്നത്. പിണറായി കൂട്ടക്കൊല കേസിലെ മുഖ്യപ്രതി സൗമ്യ ആത്മഹത്യ ചെയ്തത് സംസ്ഥാനത്തെ ഞെട്ടിച്ച സംഭവങ്ങളിലൊന്നായിരുന്നു. ഇതിനു പുറമേയാണ് ഇപ്പോൾ മോഷണ കേസിലെ പ്രതിയായ യുപി സ്വദേശി ജയിൽ ചാടിയിരിക്കുന്നത്.
ശനിയാഴ്ച്ച രാവിലെ ജയിലിലെത്തിയ ഉത്തര മേഖല ജയിൽ ഡിഐജി എം.കെ. വിനോദ്കുമാർ സംഭവ സമയത്ത് ഡ്യൂട്ടിയിലുണ്ടായിരുന്ന വാർഡന്മാരുടെയും ഉയർന്ന ഉദ്യോഗസ്ഥരുടെയും മൊഴിയെടുത്തിരുന്നു. ജയിലിൽ സുരക്ഷാ വീഴ്ചയുണ്ടായതായി റിപ്പോർട്ടിലുണ്ടെന്നാണ് സൂചന .
ജന്മഭൂമി ഓണ്ലൈന്