ഉദുമ: ഇതര സംസ്ഥാനതൊഴിലാളികള് പട്ടിണിയിലാണെന്ന് തെറ്റായ സന്ദേശം വാട്സാപ്പില് പ്രചരിപ്പിച്ച യുവാവിനെതിരെ കേസ്. സെന്ട്രല് ചിത്താരിയിലെ മുഹമ്മദ് അഷറഫിനെതിരെയാണ് ബേക്കല് എസ്.ഐ. പി.അജിത്ത് കുമാറിന്റെ പരാതിയില് കേസ് എടുത്തത്.
പള്ളിക്കര കല്ലിങ്കാലില് താമസിക്കുന്ന മറുനാടന് തൊഴിലാളികള് പട്ടിണിയിലാണെന്ന തെറ്റായ സന്ദേശമാണ് ഇയാള് പ്രചരിപ്പിച്ചത്. അതേസമയം ഈ പ്രദേശങ്ങളില് മാത്രം കഴിഞ്ഞ രണ്ടുമൂന്ന് ദിവസങ്ങളില് ബേക്കല് സി.ഐ. പി.നാരായണന്, എസ്.ഐ. എന്നിവരുടെ നേതൃത്വത്തില് ഭക്ഷ്യവസ്തുക്കള് വിതരണം ചെയ്തിരുന്നു.
ചോറും കറിയും ആവശ്യമുള്ളവര്ക്ക് പള്ളിക്കര പഞ്ചായത്ത് സമൂഹ അടുക്കളയില് നിന്നും ഭക്ഷണപ്പൊതികളും വിതരണം ചെയ്യുന്നുണ്ട്. വാസ്തവം ഇതായിരിക്കെ തെറ്റായ സന്ദേശം പ്രചരിപ്പിച്ചതാണ് സ്വമേധയാ കേസെടുക്കാന് കാരണം.
