ന്യൂയോര്ക്ക്:അഞ്ചു മിനിറ്റിനുള്ളില് കൊറോണ വൈറസ് പരിശോധനാ ഫലമറിയാന് കഴിയുന്ന യന്ത്രം വികസിപ്പിച്ചതായി അമേരിക്കയില് പ്രവര്ത്തിക്കുന്ന അബോട്ട് ലബോറട്ടറീസ്. കയ്യിലെടുക്കാവുന്ന യന്ത്രത്തില്, കൊറോണ വൈറസ് പോസിറ്റീവാണെങ്കില് അഞ്ചു മിനിറ്റിനുള്ളിലും നെഗറ്റീവ് ആണെങ്കില് 13 മിനിറ്റിനുള്ളിലും അറിയാന് കഴിയുമെന്നാണ് അബോട്ടിന്റെ അവകാശവാദം.
കൊറോണ വൈറസ് അതിവേഗത്തില് വ്യാപിക്കുന്ന സാഹചര്യത്തില് രോഗ സ്ഥിരീകരണം കഴിയുന്നത്ര വേഗം നടത്താന് കഴിയുന്നത് കൊറോണക്കെതിരെയുള്ള പോരാട്ടത്തില് ലോകത്തിനാകമാനം വലിയ പ്രതീക്ഷ നല്കുമെന്നാണ് കരുതുന്നത്. പരീക്ഷണാടിസ്ഥാനത്തിലുള്ള ഉപയോഗത്തിന് ആരോഗ്യരംഗത്തുള്ളവര്ക്ക് ഉപകരണം ലഭ്യമാക്കാന് യുഎസ് ഫുഡ് ആന്ഡ് ഡ്രഗ് അഡ്മിനിസ്ട്രേഷന്(എഫ്ഡിഎ) നിര്മ്മിച്ച അബോട്ട് കമ്പനിക്ക് അടിയന്തര അനുമതി നല്കിയിട്ടുണ്ട്.
ഒരു ടോസ്റ്ററിന്റെ മാത്രം വലിപ്പമുള്ള ഉപകരണത്തിന്റെ പ്രവര്ത്തനം മോളിക്യുലാര് ടെക്നോളജി ഉപയോഗിച്ചാണ്. ഒരു പ്രത്യേക കേന്ദ്രത്തിലേക്ക് അയച്ച് ഫലത്തിനു കാത്തിരിക്കാതെ കൊറോണ ഹോട്ട്സ്പോട്ട് ആയ സ്ഥലങ്ങളിലെല്ലാം ഈ ഉപകരണം എത്തിക്കാന് കഴിഞ്ഞാല് രോഗികളെ കണ്ടെത്തി എളുപ്പം ക്വാറന്റൈന് ചെയ്യാനും ചികിത്സ ആരംഭിക്കാനും കഴിയുമെന്നാണ് ഇതിന്റെ മറ്റൊരു നേട്ടമായി ലബോറട്ടറി അവകാശപ്പെടുന്നത്. അടിയന്തര ഉപയോഗത്തിനുള്ള അനുമതി മാത്രമേ നിലവില് എഫ്ഡിഎ നല്കിയിട്ടുള്ളൂവെന്നും അബോട്ട് കമ്പനി അറിയിച്ചു.
കേരളത്തില് റാപ്പിഡ് ടെസ്റ്റിന് അനുമതി
തിരുവനന്തപുരം: കോവിഡ് 19 പോസിറ്റീവ് കേസുകള് വര്ധിക്കുന്ന സാഹചര്യത്തില് സംസ്ഥാനത്ത് സാമൂഹ്യ വ്യാപനം തടയാനായി പരിശോധനാ ഫലങ്ങള് വേഗത്തിലാക്കാന് റാപ്പിഡ് ടെസ്റ്റ് നടത്തും. ഇതിന് ഇന്ത്യന് കൗണ്സില് ഓഫ് മെഡിക്കല് റിസര്ച്ച് (ഐ.സി.എം.ആര്). അനുമതി ലഭിച്ചിട്ടുണ്ട്.
ഐ.സി.എം.ആര്. അനുമതിയുള്ള റാപ്പിഡ് ടെസ്റ്റ് കിറ്റുകളുപയോഗിച്ചാണ് പരിശോധന നടത്തുന്നത്. സമൂഹത്തില് സ്ക്രീനിംഗ് നടത്തി അവരില് പരിശോധന നടത്തി രോഗ സാധ്യതയുള്ളവരെ കണ്ടെത്താനാകും. അവരെ നിരീക്ഷണത്തിലാക്കി ആവശ്യമുള്ളവരെ പോളിമെര് ചെയിന് റിയാക്ഷന്( പി.സി.ആര്). പരിശോധനയ്ക്ക് വിധേയമാക്കാവുന്നതാണ്. പ്രാഥമിക സ്ക്രീനിംഗിലൂടെ വിവിധതരത്തിലുള്ള വൈറസ് വ്യാപനം ഉണ്ടോയെന്ന് അറിയുന്നതിനായി ഉപയോഗിക്കുന്ന ലളിതമായ പരിശോധന മാര്ഗമാണ് റാപ്പിഡ് ടെസ്റ്റ്.
മറ്റ് ഉപകരണങ്ങളുടെ സഹായമില്ലാതെ 10 മിനിറ്റ് മുതല് 30 മിനിറ്റിനുള്ളില് വളരെ വേഗത്തില് ഫലമറിയാന് കഴിയും. ഗുണമേന്മയുള്ള പരിശോധനാ കിറ്റുകള് ഉയോഗിച്ചാല് വളരെയധികം ആളുകളുടെ പരിശോധനകള് വേഗത്തിലാക്കി രോഗവ്യാപനം വളരെ പെട്ടെന്ന് അറിയാന് കഴിയും. അതേസമയം ചെലവ് വളരെ കുറവെന്ന പ്രത്യേകതയുമുണ്ട്.
നിലവില് പിസിആര് ടെസ്റ്റ് വഴിയാണ് ഇന്ത്യയില് എല്ലാ രോഗികളിലും വൈറസ് ബാധയുണ്ടോ എന്ന് തിരിച്ചറിയുന്നത്. രണ്ട് തരം പരിശോധനകളിലൂടെയാണ് കോവിഡ് 19 സ്ഥിരീകരിക്കുന്നത്. ഇജീന് പരിശോധനകള്ക്കായുള്ള റിയല്ടൈം റിവേഴ്സ് ട്രാന്സ്ക്രിപ്റ്റേഴ്സ് പി.സി.ആര്. എന്ന മോളിക്കുളാര് പരിശോധനയാണ് ആദ്യം നടത്തുന്നത്. കോവിഡ് 19 സ്ഥിരീകരിക്കുന്നതിനുള്ള ആര്.ഡി.ആര്.പി., ഒ.ആര്.എഫ്. 1 ബി. ജീനുകള് കണ്ടെത്താനുള്ള പരിശോധനയാണ് രണ്ടാമത്തേത്. ശരീരത്തില് എന്തെങ്കിലും വൈറസ് ബാധ ഉണ്ടോയെന്നറിയാനാണ് റാപ്പിഡ് ടെസ്റ്റ് നടത്തുന്നത്.
അതേസമയം കൂടുതല് കൃത്യമായ വിവരങ്ങള് ലഭിക്കുന്നതിനാലാണ് കോവിഡ് 19 തിരിച്ചറിയുന്നതിന് പിസിആര് ടെസ്റ്റ് നടത്തുന്നത്. പിസിആര് ടെസ്റ്റിന് സമയവും ചെലവും കൂടുതലാണ്. എന്നാല് സാമൂഹ്യ വ്യാപനം പെട്ടെന്ന് തിരിച്ചറിയേണ്ടതിനാലാണ് വൈറസ് വ്യാപനം കണ്ടെത്താന് റാപ്പിഡ് ടെസ്റ്റ് നടത്തുന്നത്. രക്ത പരിശോധനയിലൂടെയാണ് റാപ്പിഡ് ടെസ്റ്റ് നടത്തുന്നത്. വെറസ് മനുഷ്യ ശരീരത്തില് പ്രവേശിച്ചാലുണ്ടാകുന്ന ആന്റിബോഡികള് തിരിച്ചറിയുന്ന രീതിയാണ് റാപ്പിഡ് ടെസ്റ്റ് അവലംബിക്കുന്നത്. വൈറസ് മനുഷ്യ ശരീരത്തില് പ്രവേശിച്ചാല് ദിവസങ്ങള്ക്കകം ശരീരം ആന്റിബോഡികള് നിര്മിച്ച് തുടങ്ങും. ഈ ആന്റിബോഡികള് രക്തത്തിലുണ്ടോ എന്ന് അതിവേഗം കണ്ടെത്തുന്നതാണ് റാപ്പിഡ് ടെസ്റ്റിലെ പരിശോധന രീതി.
കൊറോണ വൈറസ് മാത്രമല്ല ഏത് വൈറസ് ബാധ പടരുമ്പോഴും സമൂഹ്യ വ്യാപനമുണ്ടായോ എന്നറിയാന് റാപ്പിഡ് ടെസ്റ്റാണ് ഉപയോഗിക്കുന്നത്. സമൂഹത്തില് കൂടുതല് നിയന്ത്രണങ്ങള് ഏര്പ്പെടുത്തി സാഹചര്യം നിയന്ത്രണ വിധേയമാക്കാന് സാധിക്കും. അതേസമയം വൈറസ് ഒരാളുടെ ശരീരത്തില് പ്രവേശിച്ച് ഏതാനം ദിവസങ്ങള് കഴിഞ്ഞ ശേഷം മാത്രമേ റാപ്പിഡ് ടെസ്റ്റിലൂടെ ഫലം അറിയാന് സാധിക്കൂ. ഐ.സി.എം.ആറിന്റെ അനുമതിയുള്ള സര്ക്കാര്, സ്വകാര്യ ലാബുകള്ക്ക് മാത്രമേ റാപ്പിഡ് ടെസ്റ്റ് നടത്താന് അനുമതിയുള്ളൂ
. ഡോക്ടറുടെ കുറിപ്പടിയോടെ മാത്രമേ റാപ്പിഡ് ടെസ്റ്റ് നടത്താന് പാടുള്ളൂ. വിദേശരാജ്യങ്ങളില് നിന്ന് തിരിച്ചെത്തിയവര്, അവരുമായി അടുത്ത സമ്പര്ക്കം പുലര്ത്തിയവര്, കോവിഡ് രോഗം ഉണ്ടെന്ന് ഡോക്ടര്മാര് സംശയിക്കുന്നവര്, കോവിഡ് രോഗികളെ പരിചരിക്കുന്നവരും അവരുമായി ഇടപഴകുന്നതുമായ ആരോഗ്യപ്രവര്ത്തകര്, സാധാരണയില് കവിഞ്ഞ് ഗുരുതര ശ്വാസകോശ രോഗങ്ങള് റിപ്പോര്ട്ട് ചെയ്യപ്പെട്ട പ്രദേശത്തെ ജനങ്ങള്, ഗുരുതര ശ്വാസകോശ രോഗങ്ങളില് നിന്ന് രോഗമുക്തി നേടിയവര് എന്നിവര് മാത്രമേ ടെസ്റ്റിന് വിധേയമാക്കേണ്ടതുള്ളു.
നിലവില് നിരീക്ഷണത്തിലുള്ളവരിലും അവരുമായി ബന്ധപ്പെട്ടവരും തുടങ്ങിയ എല്ലാവരിലും അതിവേഗം പരിശോധന നടത്തി ഫലമറിയാന് റാപ്പിഡ് ടെസ്റ്റ് സഹായിക്കും. ഈ ടെസ്റ്റിലൂടെ പോസിറ്റീവുള്ളവരെ നിരീക്ഷണത്തിലാക്കാനും അവരില് ആവശ്യമുള്ളവര്ക്ക് വിദഗ്ധ പരിശോധനയും ചികിത്സയും നല്കാനും സഹായിക്കും. അതിലൂടെ സമൂഹ വ്യാപനം പെട്ടെന്ന് തടയാനാകും
ജന്മഭൂമി ഓണ്ലൈന്