ന്യൂദല്ഹി: കൊറോണ വൈറസ് വ്യാപകമാകുന്ന പശ്ചാത്തലത്തില് രോഗത്തിനെതിരായ പ്രതിരോധ പ്രവര്ത്തനങ്ങള്ക്കായി പ്രാദേശിക വികസന ഫണ്ടില് നിന്നും ഒരു കോടി രൂപ അനുവദിച്ച് ലോക്സഭാ എംപി ഗൗതം ഗംഭീര്. തന്റെ ഒരു മാസത്തെ ശമ്പളം പ്രധാനമന്ത്രിയുടെ ദുരിതാശ്വാസ നിധിയിലേക്ക് അദ്ദേഹം സംഭാവന നല്കുകയും ചെയ്തു. ട്വിറ്ററിലൂടെയാണ് അദ്ദേഹം ഇക്കാര്യം അറിയിച്ചത്.
കൊറോണ വൈറസ് വ്യാപനം തടയാനായി ലോക്ക് ഡൗണ് പ്രഖ്യാപിച്ച സാഹചര്യത്തില് ജനങ്ങള്ക്ക് വേണ്ട സഹായങ്ങള് നല്കാനായി ഗൗതം ഗംഭീര് ഫൗണ്ടേഷന് സന്നദ്ധ പ്രവര്ത്തകര് പുറപ്പെടുകയാണെന്ന് നേരത്തെ അദ്ദേഹം പറഞ്ഞിരുന്നു.
കൊറോണ വൈറസ് വ്യാപനത്തിനെതിരായ പോരാട്ടത്തിന് പിന്തുണയുമായി നിരവധി പേര് രംഗത്തെത്തിയിട്ടുണ്ട്. ക്രിക്കറ്റ് താരങ്ങളായ സച്ചിന് ടെണ്ടുല്ക്കര് (50 ലക്ഷം), സുരേഷ് റെയ്ന (52 ലക്ഷം) എന്നിവരും പ്രധാനമന്ത്രിയുടെ ദുരിതാശ്വാസ നിധിയിലേക്ക് സംഭാവന നല്കിയിരുന്നു.
