ന്യൂദല്‍ഹി: അര്‍ജന്റീനയുടെ ലയണല്‍ മെസിയേക്കാള്‍ മികച്ച കളിക്കാരന്‍ പോര്‍ച്ചുഗീസിന്റെ ക്രിസ്റ്റിയാനോ റൊണാള്‍ഡോയാണെന്ന് ഇതിഹാസതാരം പെലെ. സ്ഥിരതയാര്‍ന്ന പ്രകടനമാണ് റൊണോയെ മികച്ച താരമാക്കുന്നതെന്ന് പില്‍ഹാഡോ യൂ ട്യൂബിന് നല്‍കിയ അഭിമുഖത്തില്‍ പെലെ പറഞ്ഞു.
നിലവില്‍ റൊണോയാണ് മികച്ച കളിക്കാരന്‍. പത്ത് വര്‍ഷമായി റൊണാള്‍ഡോ മികച്ച പ്രകടനം കാഴ്ചവച്ചുവരുകയാണ്.
ഈ സീസണില്‍ യുവന്റസിനായി തുടര്‍ച്ചയായി പതിനൊന്ന് മത്സരങ്ങളില്‍ ഗോള്‍ നേടി റൊണോ സിരി എ യില്‍ റെക്കോഡിനൊപ്പം എത്തി. ഗബ്രിയേല്‍ ബാറ്റിസ്റ്റിയൂട്ടയും ഫാബിയാനോയുമാണ് റൊണോയ്‌ക്ക് മുമ്പ് സിരി എയില്‍ തുടര്‍ച്ചയായി പതിനൊന്ന് മത്സരങ്ങളില്‍ സ്‌കോര്‍ ചെയ്ത് റെക്കോഡിട്ട താരങ്ങള്‍.
തന്റെ കാലത്ത് കളിക്കളത്തില്‍ ഒരു രാജാവേ ഉണ്ടായിരുന്നുള്ളൂ. അത് താന്‍ തന്നെയാണെന്ന് പെലെ പറഞ്ഞു. ലോകകപ്പ് മൂന്ന് തവണ നേടിയ ഒരേയൊരു താരമാണ് പെലെ. ഇരുപത്തിരണ്ട് വര്‍ഷം നീണ്ട പ്രൊഫഷണല്‍ കരിയറില്‍ പെലെ ആയിരം ഗോളുകള്‍ നേടി.
യുവന്റ്‌സ് സ്‌ട്രൈക്കറായ റൊണാള്‍ഡോ നിലവില്‍ ക്വാറന്റൈനിലാണ്. സഹതാരം ഡാനിലി രുഗാനിക്ക് കൊവിഡ് ബാധിച്ചതിനെ തുടര്‍ന്നാണ് റൊണാള്‍ഡോ ക്വാറന്റൈനിലായത്.
പ്രതികരിക്കാൻ ഇവിടെ എഴുതുക: