മോസ്കോ: കൊറോണ (കൊവിഡ് 19) രോഗ ബാധയ്ക്ക് കാരണമാകുന്ന വൈറസിന്റെ ജനിതകഘടനയും ചിത്രങ്ങളും പുറത്ത് വിട്ട് റഷ്യന് അധികൃതര്. സ്മോറോഡിന്ത്സേവ് റിസര്ച്ച് ഇന്സ്റ്റിറ്റ്യൂട്ട് ഓഫ് ഇന്ഫ്ളുവന്സയിലെ ഗവേഷകരാണ് ജനിതകഘടന കണ്ടെത്തിയതെന്ന് റഷ്യന് ആരോഗ്യ മന്ത്രാലയം പ്രസ്താവനയിലൂടെ വ്യക്തമാക്കി. ഇത് ലോകാരോഗ്യ സംഘടനയുടെ ഡാറ്റാ ബേസിലേയ്ക്ക് കൈമാറിയിട്ടുണ്ടെന്നും അവര് വ്യക്തമാക്കി.
വൈറസിന്റെ ജനിതകഘടന ആദ്യമായിട്ടാണ് പൂര്ണമായി ഡിക്കോഡ് ചെയ്യുന്നതെന്ന് റഷ്യന് അധികൃതര് പറഞ്ഞു. കൊവിഡ് 19 ബാധിച്ച രോഗിയില് നിന്നെടുത്ത സാമ്പിള് ഉപയോഗിച്ചാണ് SARS-CoV-2 കൊറോണവൈറസിന്റെ പൂര്ണമായ ജനിതകഘടന ആദ്യമായി കണ്ടെത്തിയതെന്നും അധികൃതര് പറയുന്നു. നോവോസിബിര്സ്കിലെ സ്റ്റേറ്റ് റിസര്ച്ച് സെന്റര് ഓഫ് വൈറോളജി ആന്ഡ് ബയോടെക്നോളജി (വെക്ടര്)യിലെ ഗവേഷകരാണ് വൈറസിന്റെ സൂക്ഷ്മചിത്രം പകര്ത്തിയത്.
വൈറസിന്റെ ജനിതക പഠനം വൈറസിന്റെ പരിണാമത്തെക്കുറിച്ചും സ്വഭാവരീതികളെക്കുറിച്ചും മനസ്സിലാക്കുന്നതിന് ഗവേഷകരെ സഹായിക്കുമെന്നും സ്മോറോഡിന്ത്സേവ് റിസര്ച്ച് ഇന്സ്റ്റിറ്റിയൂട്ട് ഓഫ് ഇന്ഫ്ളുവന്സ തലവന് ദിമിത്രി ലിയോസ്നോവ് പറഞ്ഞു.
പുതിയ കൊറോണ വൈറസാണിത്. അതുകൊണ്ടുതന്നെ ഇതിന്റെ വ്യാപനത്തെക്കുറിച്ചും ഇത് എങ്ങനെയൊക്കെ പരിണമിക്കുന്നു എന്നതിനെക്കുറിച്ചും അറിവുണ്ടാവുക എന്നത് സുപ്രധാനമാണ്. പ്രതിരോധ മരുന്നുകള് വികസിപ്പിക്കാനും രോഗത്തിനെ ചെറുക്കുന്ന മരുന്നുകള് കണ്ടെത്താനും ഈ അറിവ് സഹായിക്കുമെന്നും അദ്ദേഹം പറഞ്ഞു.
