ജനീവ: കൊറോണ വൈറസ് ബാധ മൂലം പ്രായമായവരാണ് കൂടതല് മരിച്ചതെങ്കിലും ചെറുപ്പക്കാരും സുരക്ഷിതരല്ലെന്ന് ലോക ആരോഗ്യ സംഘടന. ചെറുപ്പാക്കാരിലും വൈറസ് ബാധ കൊണ്ടുള്ള മരണ സാധ്യത ഏറെയാണെന്ന് വേള്ഡ് ഹെല്ത്ത് ഓര്ഗനൈസേഷന് ഡയറക്ടര് ജനറല് അറിയിച്ചു.
മുതിര്ന്നവരാണ് കൊവിഡിന് പെട്ടെന്ന് കീഴ്പ്പെടുന്നതെന്നും ചെറുപ്പക്കാര് സുരക്ഷിതരാണെന്നുമുള്ള തോന്നലുണ്ട്. എന്നാല് കാര്യങ്ങളുടെ സ്ഥിതി അങ്ങനെയല്ലെന്ന് ലോകാരോഗ്യ സംഘടന വ്യക്തമാക്കി.
ലോകത്താകമാനം കൊവിഡ് ബാധിച്ച് മരിച്ചവരുടെ എണ്ണം പതിനൊന്നായിരം കടന്നിരിക്കുകയാണ്. 11,378 പേരാണ് ഇതുവരെ മരിച്ചത്. ഇറ്റലിയില് മരിച്ചവരുടെ എണ്ണം നാലായിരം കടന്നു. ഇന്നലെ മാത്രം 627 പേരാണ് ഇറ്റലിയില് മരിച്ചത്. ആറായിരത്തോളം പേര്ക്ക് ഇറ്റലിയില് ഇന്നലെ പുതുതായി രോഗം സ്ഥിരീകരിച്ചു. മുപ്പതിനായിരത്തോളം പുതിയ കേസുകളാണ് ലോകത്താകമാനം ഇന്നലെ റിപ്പോര്ട്ട് ചെയ്തത്. ഇതോടെ കൊവിഡ് ബാധിതരുടെ എണ്ണം 275143 കടന്നു.
സ്പെയിനിലും ഇറാനിലും ആയിരത്തിലധികം ആളുകളാണ് ഇന്നലെ മരിച്ചത്. മലേഷ്യയിലും ഇസ്രായേലിലും ,ഈജിപ്തിലും കൊവിഡ് മരണം റിപ്പോര്ട്ട് ചെയ്തു. അമേരിക്കയില് 5,496 പേര്ക്ക് പുതുതായി രോഗം സ്ഥിരീകരിച്ചു. ബ്രിട്ടന് സമ്പൂര്ണ്ണ സമ്പര്ക്ക വിലക്ക് പ്രഖ്യാപിച്ചു. എല്ലാ സ്ഥാപനങ്ങളും അടച്ചുപൂട്ടാന് പ്രധാനമന്ത്രി ബോറിസ് ജോണ്സന് ഉത്തരവിട്ടു.
അതേസമയം കേരളത്തില് ഇന്നലെ 12 പേര്ക്ക് കൂടി കൊവിഡ് സ്ഥികരിച്ചതായി മുഖ്യമന്ത്രി പിണറായി വിജയന് അറിയിച്ചിരുന്നു. കാസര്ഗോഡ് ആറ് പേരിലും എറണാകുളത്ത് അഞ്ച് പേരിലും പാലക്കാട് ഒരാള്ക്കുമാണ് ഇന്നലെ രോഗം സ്ഥിരീകരിച്ചത്.
