ബിജിങ്: മൂന്ന് അമേരിക്കന്‍ മാധ്യമങ്ങള്‍ക്ക് ചൈനയല്‍ വിലക്ക് ഏര്‍പ്പെടുത്തി. ന്യൂയോര്‍ക്ക് ടൈംസ്, വാള്‍സ്ട്രീറ്റ് ജേണല്‍, വാഷിങ്ടണ്‍ പോസ്റ്റ് തുടങ്ങിയ മാധ്യമങ്ങളുടെ റിപ്പോര്‍ട്ടര്‍മാര്‍ രാജ്യം വിടാനാണ് ആവശ്യപ്പെട്ടിരിക്കുന്നത്. ചൈനീസ് ഭരണകൂടത്തിന്റേതാണ് നിര്‍ദ്ദേശം.
യുഎസ് മാധ്യമ മേഖലകളില്‍ തൊഴിലെടുക്കുന്ന ചൈനീസ് വംശജരുടെ എണ്ണം പരിമിതപ്പെടുത്താനുള്ള ട്രംപ് ഭരണകൂടത്തിന്റെ തീരുമാനത്തില്‍ പ്രതിഷേധിച്ചാണ് ചൈനയുടെ തീരുമാനം. കൂടാതെ ചൈനയില്‍നിന്നുള്ള മാധ്യമങ്ങള്‍ക്ക് അമേരിക്കയില്‍ നിയന്ത്രണങ്ങളും ഏര്‍പ്പെടുത്തിയിരുന്നു. രാഷ്‌ട്രീയ പ്രേരിതമായ വിവേചനത്തിന് ഇവര്‍ വിധേയമാക്കപ്പെടുകയാണെന്നും ചൈനീസ് വിദേശ കാര്യ മന്ത്രാലയം അറിയിച്ചു.
ഈ വര്‍ഷം അവസാനത്തോടെ കാലഹരണപ്പെടുന്ന പ്രസ് കാര്‍ഡുകള്‍ പത്ത് ദിവസത്തിനുള്ളില്‍ തിരികെ നല്‍കാനുമാണ് ചൈനീസ് ഭരണകൂടം ഇപ്പോള്‍ നിര്‍ദ്ദേശം നല്‍കിയിരിക്കുന്നത്. മാധ്യമ പ്രവര്‍ത്തകര്‍ക്ക് 12 മാസത്തെ വിസയും പ്രസ് കാര്‍ഡുമാണ് ചൈന അനുവദിക്കുന്നത്.
അതേസമയം യുഎസ് മാധ്യമപ്രവര്‍ത്തകരെ ചൈനയില്‍ മാത്രമല്ല ഹോങ്കോങിലെ മക്കാവുവിലെയും പ്രത്യേക ഭരണപ്രദേശങ്ങളിലും പ്രവര്‍ത്തിക്കാന്‍ അനുവദിക്കില്ലെന്നും ചൈനീസ് വിദേശകാര്യ വക്താവ് അറിയിച്ചു. അതേസമയം ഹോങ്കോങിലെ വിദേശ മാധ്യമങ്ങളുടെ കാര്യങ്ങള്‍ ആ നഗരത്തിലെ ഭരണാധികാരികള്‍ തന്നെയാണ് തീരുമാനിക്കുന്നത്. ഇത് സംബന്ധിച്ച് ചൈനയും ഹോങ്കോങും തമ്മില്‍ കരാറും നിലവിലുണ്ട് അതില്‍നിന്ന് ഭിന്നമാണ് ചൈനയുടെ ഇപ്പോഴത്തെ നടപടി.
കൂടാതെ വോയ്സ് ഓഫ് അമേരിക്ക, ടൈം മാഗസിന്‍ എന്നിവയടക്കമുള്ള മാധ്യമങ്ങളുടെ രേഖകള്‍ ഉടന്‍ സമര്‍പ്പിക്കണമെന്നും ചൈന ആവശ്യപ്പെട്ടു. അടുത്തിടെ വാണിജ്യ- വ്യാപാര രാഷ്‌ട്രീയ രംഗങ്ങളില്‍ യുഎസും ചൈനയും തമ്മില്‍ ഏറ്റുമുട്ടലുകള്‍ നടന്നിരുന്നു. അതിന്റെ തുടര്‍ച്ചയായാണ് മാധ്യമങ്ങള്‍ക്കു നേരെയും ഇരുരാജ്യങ്ങള്‍ വിലക്ക് കൊണ്ടുവന്നിരിക്കുന്നത്.
പ്രതികരിക്കാൻ ഇവിടെ എഴുതുക: