തിരുവനന്തപുരം: ആറ്റുകാല് ദേവി ക്ഷേത്രത്തിലെ പൊങ്കാല റദ്ദാക്കേണ്ട ആവശ്യമില്ലെന്ന് ഗവര്ണര് ആരിഫ് മുഹമ്മദ് ഖാന്. കേരളത്തിന്റെ ആരോഗ്യ സംവിധാനം സുശക്തമാണ്. പത്തനംതിട്ടയില് അഞ്ച് പുതിയ കേസുകള് സ്ഥിരീകരിച്ചെങ്കിലും മുന്കരുതലുകള് എടുത്താല് മതിയെന്നും ഗവര്ണര് വ്യക്തമാക്കി.
കൊറോണ വൈറസ് വീണ്ടും സ്ഥിരീകരിച്ചതിന്റെ അടിസ്ഥാനത്തില് ആറ്റുകാല് പൊങ്കാലയ്ക്ക് നിയന്ത്രണം ഏര്പ്പെടുത്തി. ഇത്രയും മാസങ്ങള് നടത്തിയ ഒരുക്കങ്ങള് ഉള്ളതിനാല് പൊങ്കാല നിര്ത്തി വയ്ക്കേണ്ടതില്ലെന്നാണ് തീരുമാനമെന്ന് ആരോഗ്യമന്ത്രി കെ.കെ ഷൈലജ വ്യക്തമാക്കി. രോഗലക്ഷണങ്ങളുള്ളവര് ആരും പൊങ്കാല ഇടാന് വരരുത്. രോഗ ബാധിത രാജ്യങ്ങളില് നിന്നും വന്നവര് വീട്ടില് തന്നെ പൊങ്കാലയിടാന് നിര്ദേശം നല്കിയിട്ടുണ്ടെന്നും അവര് അറിയിച്ചു.
അതേസമയം, പത്തനംതിട്ടയില് നിന്ന് അഞ്ചു പേര്ക്ക് കൂടി കൊറോണ രോഗം സ്ഥിരീകരിച്ചതിന്റെ അടിസ്ഥാനത്തില് രോഗബാധിത രാജ്യങ്ങളില് നിന്നും വരുന്നവര് ഉടന് ആരോഗ്യ വകുപ്പിനെ വിവരം അറിയിക്കണം. അല്ലെങ്കില് കുറ്റകരമായി കണക്കാക്കുമെന്ന് ഡിജിപി വ്യക്തമാക്കി. അയല്പക്കക്കാരും അറിയിക്കാന് ശ്രദ്ധിക്കണം. സമൂഹമാകെ ശ്രദ്ധിക്കേണ്ടതാണ്. വിദേശത്തില് നിന്നും വന്നവര് നിര്ബന്ധമായും 28 ദിവസം വീട്ടിലെ നിരീക്ഷണത്തില് കഴിയണം. ശക്തമായ നിരീക്ഷണം നടത്താനാണ് ആരോഗ്യ വകുപ്പ് ശ്രമിക്കുന്നത്. ആറ്റുകാല് പൊങ്കാലയിടാനെത്തുന്നവരുടെ വീഡിയോ ക്ലിപ്പിംഗ് അടക്കം എടുക്കുന്നതാണെന്ന് കേരള പോലീസ് വ്യക്തമാക്കി.
