വയനാട്: എഫ്സിസി സന്യാസി സഭയില്‍ നിന്ന് പുറത്താക്കിയത് പിന്‍വലിക്കണമെന്നാവശ്യപ്പെട്ട് സിസ്റ്റര്‍ ലൂസി കളപ്പുര നല്‍കിയ രണ്ടാമത്തെ അപ്പീലും വത്തിക്കാന്‍ തള്ളി. അപ്പീല്‍ തള്ളിയതായി വത്തിക്കാനില്‍ നിന്നുള്ള മറുപടി ഉത്തരവ് സിസ്റ്റര്‍ക്ക് ലഭിച്ചു.
സന്യാസി സഭയില്‍ നിന്നും പുറത്താക്കാനുള്ള നടപടി നിര്‍ത്തിവെയ്‌ക്കണം. തന്റെ ഭാഗം കേള്‍ക്കാന്‍ തയ്യാറാകണമെന്നാവശ്യപ്പെട്ടാണ് സിസ്റ്റര്‍ ലൂസി കളപ്പുര അപ്പീല്‍ നല്‍കിയത്. ബിഷപ്പ് ഫ്രാങ്കോ മുളയ്‌ക്കലിനെതിരെയുള്ള സമരത്തില്‍ പങ്കെടുത്തതോടെയാണ് എഫ്സിസി സന്യാസി സഭയും സിസ്റ്റര്‍ ലൂസിയും തമ്മിലുള്ള പ്രശ്നങ്ങള്‍ തുടങ്ങിയത്.
എറണാകുളത്ത് നടന്ന കന്യാസ്ത്രീകളുടെ സമരത്തില്‍ പങ്കെടുത്ത് തിരിച്ചെത്തിയതു മുതല്‍ കന്യാസ്ത്രീ മഠത്തില്‍ നിന്നും സിസ്റ്റര്‍ ലൂസിക്കെതിരെ നടപടികള്‍ ആരംഭിച്ചതായും ആരോപണമുണ്ട്. പിന്നീട് പല കാരണങ്ങള്‍ ചൂണ്ടിക്കാണിച്ചുകൊണ്ട് സിസ്റ്ററെ സഭയില്‍ നിന്ന് പുറത്താക്കുകയായിരുന്നു. അതിനെതിരെയാണ് സിസ്റ്റര്‍ ആദ്യം എഫ്സസിസി അധികൃതര്‍ക്കും പിന്നീട് വത്തിക്കാനിലേക്കും അപ്പീല്‍ നല്‍കിയത്. എന്നാല്‍ ഇത് വീണ്ടും തള്ളുകയായിരുന്നു.
അതേസമയം സിസ്റ്ററെ അവര്‍ താമസിക്കുന്ന മഠത്തില്‍ നിന്ന് പുറത്താക്കരുതെന്ന് ആവശ്യപ്പെട്ട് മാനന്തവാടി മുന്‍സിഫ് കോടതിയില്‍ ഹര്‍ജി നല്‍കിയിട്ടുണ്ട്. വത്തിക്കാന്‍ അപ്പീല്‍ തള്ളിയെങ്കിലും ഹര്‍ജി നിലനില്‍ക്കുന്നതിനാല്‍ മഠത്തില്‍ നിന്നും ഇറങ്ങേണ്ടി വരില്ലെന്നാണ് നിഗമനം.
പ്രതികരിക്കാൻ ഇവിടെ എഴുതുക: