കൊച്ചി : അംഗീകാരമില്ലാത്ത സ്കൂളുകള്ക്കെതിരെ നടപടി സ്വീകരിക്കാത്തതില് സിബിഎസ്ഇക്കെതിരെ രൂക്ഷ വിമര്ശനവുമായി ഹൈക്കോടതി. തോപ്പുംപടി അരൂജ സ്കൂളിന് അംഗീകാരമില്ലാത്തതിനാല് 34 വിദ്യാര്ത്ഥികള്ക്ക് പരീക്ഷ എഴുതാന് സാധിച്ചിട്ടില്ല. ഇവരെ പരീക്ഷയെഴുതാന് അനുവദിക്കണമെന്നാവശ്യപ്പെട്ട് രക്ഷിതാക്കള് നല്കിയ ഹര്ജി പരിഗണിക്കവേയാണ് കോടതി ഇക്കാര്യം അറിയിച്ചത്.
തോന്നിയപോലെ നാട് മുഴുവന് സ്കൂളുകള് അനുവദിക്കുകയാണ് ഇവര് ചെയ്യുന്നത്. പിന്നെ ഒരു അന്വേഷണവും ഇവര് നടത്തുന്നില്ല. സിബിഎസ്ഇ കുറച്ചെങ്കിലും ഉത്തരവാദിത്തം കാണിക്കണമെന്നും കോടതി കുറ്റപ്പെടുത്തി. സിബിഎസ്ഇയുടെ മൗനം ലാഭക്കൊതിയന്മാര് മുതലാക്കുകയാണ്.
സിബിഎസ്ഇ ഇനിയും ഒളിച്ചു കളിക്കാന് നോക്കിയാല് വെറുതേ വിടില്ല. കുട്ടികളുടെ ഭാവിയാണിത്. വിദ്യാര്ത്ഥികളെ ചൂഷണം ചെയ്യാനായി ഇനിയും അനുവദിക്കില്ല. അവരുടെ ഭാവിവെച്ച് കളിക്കേണ്ടെന്നും കോടതി അറിയിച്ചു. സിബിഎസ്ഇ പ്രവര്ത്തനം ഇനിയെങ്കിലും മെച്ചപ്പെടുത്തണം ബോര്ഡിന് നല്കുന്ന അവസാന താക്കീതാണിതെന്നും ഹൈക്കോടതി പറഞ്ഞു.
മുന് വര്ഷങ്ങളില് കുട്ടികളെ മറ്റ് സ്കൂളുകളില് പരീക്ഷ എഴുതിപ്പിച്ചിട്ടുണ്ട്. ഇതുസംബന്ധിച്ചുള്ള പട്ടിക ഹാജരാക്കാന് കോടതി ആവശ്യപ്പെട്ടിട്ടുണ്ട്. കേസില് വിശദമായ സത്യവാങ്മൂലം സമര്പ്പിക്കാനും സിബിഎസ്ഇയ്ക്ക് ഹൈക്കോടതി നിര്ദേശം നല്കി. കൂടാതെ അരൂജ സ്കൂളിലെ വിദ്യാര്ത്ഥികളുടെ ഒരു വര്ഷം നഷ്ടപ്പെടാതിരിക്കാന് കഴിയുമോ എന്ന് സര്ക്കാര് അറിയിക്കാനും ആവശ്യപ്പെട്ടിട്ടുണ്ട്.
