കൊച്ചി: കേരള കോണ്ഗ്രസ് (ജേക്കബ്) പാര്ട്ടി പിളര്ന്നു. അനൂപ് ജേക്കബ്, ജോണി നെല്ലൂര് വിഭാഗങ്ങള് പ്രത്യേകമായി കോട്ടയത്ത് യോഗം ചേര്ന്നു. സംസ്ഥാന കമ്മിറ്റി യോഗമാണ് ചേര്ന്നതെന്നാണ് ഇരുഭാഗത്തിന്റേയും അവകാശവാദം. കേരള കോണ്ഗ്രസ് മാണി പാര്ട്ടിയിലെ പി.ജെ. ജോസഫ് വിഭാഗവുമായി ലയിക്കുമെന്ന് ജോണി നെല്ലൂര് പ്രഖ്യാപിച്ചു. പാര്ട്ടിയെ ഭിന്നിപ്പിക്കാന് അനൂപ് ജേക്കബ് അച്ചാരം വാങ്ങിയെന്നു ജോണി നെല്ലൂര് ആരോപിച്ചു. പാര്ട്ടി എന്താണെന്ന് അനൂപിന് അറിയില്ല. ജോസഫിനോട് ഡെപ്യൂട്ടി ലീഡര് സ്ഥാനം അനൂപ് ആവശ്യപ്പെട്ടു. അത് ലഭിക്കില്ലെന്ന് ഉറപ്പായപ്പോള് ലയനത്തെ എതിര്ത്തെന്നും ജോണി ആരോപിച്ചു. അമ്മയ്ക്കു നിയമസഭ സീറ്റ് നല്കരുതെന്ന് അനൂപ് ജേക്ക് ആവശ്യപ്പെട്ടെന്ന് ജോണി നെല്ലൂര് ആരോപിച്ചു. ടി.എം. ജേക്കബിന്റെ സംസ്കാരച്ചടങ്ങിലാണ് ഇക്കാര്യം അനൂപ് ആവശ്യപ്പെട്ടതെന്നും ജോണി.
ജോസഫ് വിഭാഗവുമായി ലയിക്കാനുള്ള ചര്ച്ചകളാണ് ഇപ്പോള് പാര്ട്ടിയെ പിളര്പ്പില് എത്തിച്ചത്. ലയനം സംബന്ധിച്ച് ജോണി നെല്ലൂര് നേരത്തെ തന്നെ ജോസഫുമായി ധാരണയിലെത്തിയിരുന്നു. അനൂപ് ജേക്കബ് സംസ്ഥാന കമ്മിറ്റി ഓഫിസിലാണ് സംസ്ഥാന കമ്മിറ്റി വിളിച്ചുചേര്ത്തത്. ജോസഫ് ഗ്രൂപ്പുമായുള്ള ലയനത്തോട് ആദ്യം താല്പര്യം കാണിച്ച അനൂപ് ജേക്കബ് പിന്നീട് പിന്വാങ്ങിയതോടെയാണ് ചര്ച്ചകള് വഴിമുട്ടിയതും പിളര്പ്പിലേക്ക് എത്തിയതും.
