ബത്തേരി: ദേശീയപാത 766 ലെ രാക്കുരുക്ക് സംബന്ധിച്ച്ബദല്പാതയെ തള്ളി സംസ്ഥാന സര്ക്കാര് സുപ്രീംകോടതിയില് സത്യവാങ്മൂലം നല്കി. ബദല്പാത അംഗീകരിക്കാനാവില്ലന്നും പാരിസ്ഥിതിക ദുര്ബല പ്രദേശത്തുകൂടിയാണ് പാത കടന്നുപോകുന്നതെന്നുമാണ് വാദം. എന്എച്ച് 766 വയനാട് ജില്ലയുടെ അതിജീവന പാതയാണെന്നും സുപ്രീംകോടതിയില് സംസ്ഥാന സര്ക്കാര് നല്കിയ സത്യവാങ്മൂലത്തില് പറയുന്നു.
ബദല്പാത ദേശീയപാതയായി ഉയര്ത്തുമ്പോള് വനവും ആയിരക്കണക്കിന് ഹെക്ടര് കൃഷിഭൂമിയും നശിക്കും. കര്ണാടക ഉദ്യോഗസ്ഥര് മാത്രമാണ് ബദല്പാതയ്ക്ക് ശുപാര്ശ ചെയ്തതെന്നും സത്യവാങ്മൂലത്തില് സര്ക്കാര് ചൂണ്ടിക്കാട്ടുന്നു. അതിനാല് മാനന്തവാടി-കുട്ട-ഗോണിക്കുപ്പ റോഡ് അംഗീകരിക്കാനാവില്ല.പാത കടന്നുപോകുന്ന ബന്ദിപ്പൂര് വനത്തില് ഏര്പ്പെടുത്തിയ രാത്രിയാത്ര നിരോധനം നീക്കണമെന്നും സത്യവാങ്മൂലത്തില് സര്ക്കാര് ആവശ്യപ്പെട്ടിട്ടുണ്ട്. യാത്ര നിരോധനത്തിന് പകരം ആകാശ പാത നിര്മിക്കാന് നിര്ദേശം നല്കണം. കടുവ സംരക്ഷണത്തിന് ഒരു പ്രദേശത്തുമാത്രം നിരോധനം ഉചിതമല്ലെന്നും പ്രാദേശിക ഭരണകൂടങ്ങള് യാത്രാനിരോധനങ്ങള് ഏര്പ്പെടുത്തിയാല് ദേശീയപാതയുടെ പ്രസക്തി നഷ്ടപ്പെടുമെന്നും സത്യവാങ്മൂലത്തില് ചൂണ്ടിക്കാട്ടുന്നു. ദേശീയപാത 766 ല് ബന്ദിപ്പൂര് വനമേഖലയില് രാത്രി ഒമ്പത് മുതല് പുലര്ച്ചെ ആറ് വരെയാണ് യാത്രാനിരോധനം ഏര്പ്പെടുത്തിയത്. ഈ കേസ് പരിഗണിക്കുന്നത് സുപ്രീംകോടതി മാര്ച്ച് അവസാനവാരത്തിലേക്ക് മാറ്റി.
