മട്ടന്നൂര്: പൗരത്വ ഭേദഗതി വിഷയത്തില് ഹിന്ദുക്കളേയും മുസ്ലീങ്ങളേയും ഭിന്നിപ്പിക്കാനാണ് സിപിഎമ്മും കോണ്ഗ്രസും ശ്രമിക്കുന്നതെന്ന് യുവമോര്ച്ച സംസ്ഥാന സെക്രട്ടറി സന്ദീപ് വാര്യര്. ചാവശ്ശേരിയില് ജനജാഗരണ സമിതി സംഘടിപ്പിച്ച ജനജാഗ്രത സമ്മേളനത്തില് മുഖ്യ പ്രഭാഷണം നടത്തുകയായിരുന്നു അദ്ദേഹം.
രാജ്യ താല്പര്യമല്ല വോട്ടുരാഷ്ടീയമാണ് ഇക്കൂട്ടര്ക്ക് വലുത്. കോണ്ഗ്രസ്സും കമ്മ്യൂണിസ്റ്റുകളും ജിഹാദികളും പൗരത്വ ഭേദഗതി വിഷയത്തില് കള്ളപ്രചാരണം നടത്തി കലാപമുണ്ടാക്കാന് ശ്രമിക്കുമ്പോള് രാജ്യത്തെ എല്ലാ പൗരന്മാരും ഭാരതമാതാവിന്റെ മക്കളാണെന്നാന്ന് പ്രധാനമന്ത്രി നരേന്ദ്രമോദി പറയുന്നത്. ഇസ്ലാം മതസ്ഥര്ക്ക് ഏറ്റവും പ്രധാനപ്പെട്ട പുണ്യസ്ഥലമായ മക്കയും മദീനയും സ്ഥിതി ചെയ്യുന്ന സൗദി അറേബ്യ ആ രാജ്യത്തെ ഏറ്റവും വലിയ പുരസ്കാരം നല്കിയാണ് നരേന്ദ്ര മോദിയെ ആദരിച്ചത്.
കേരള പോലീസില് വന് അഴിമതിയാണ് നടക്കുന്നത്. അതിനു കൂട്ടുപിടിക്കുന്നത് ഡിജിപിയാണ്. തോക്കുകളും ആയിരക്കണക്കിന് വെടിയുണ്ടകളും കാണാതായതായി സിഎജി റിപ്പോര്ട്ടില് പറയുമ്പോള് മുഖ്യമന്ത്രിയടക്കം അതു കണ്ടുപിടിച്ച സിഎജിയെ ആണ് കുറ്റപ്പെടുന്നത്. 21 ല് ഊരിയ കത്തിയെക്കുറിച്ച് പറയുന്നവര് കാലം മാറിയത് ഓര്ക്കണമെന്നും സന്ദീപ് വാര്യര് പറഞ്ഞു.
യുവമോര്ച്ച സംസ്ഥാന വൈസ് പ്രസിഡണ്ട് ബിജു ഏളക്കുഴി ജനജാഗ്രതാ സമ്മേളനം ഉദ്ഘാടനം ചെയ്തു. ഇരിട്ടി നഗരസഭാംഗം സി.വി. രവീന്ദ്രന് അധ്യക്ഷത വഹിച്ചു. ഹിന്ദു ഐക്യവേദി ജില്ലാ സെക്രട്ടറി പി.വി.ശ്യാം മോഹന്, ബിജെപി പേരാവൂര് നിയോജക മണ്ഡലം പ്രസിഡണ്ട് എം.ആര്. സുരേഷ് തുടങ്ങിയവര് സംസാരിച്ചു. കെ.വി.രതീഷ് സ്വാഗതം പറഞ്ഞു.
