ടിക്ക് ടോക്കില് പരക്കുന്ന ഒരു പുതിയ വീഡിയോക്കെതിരെ രൂക്ഷ വിമര്ശനവുമായി റെയില്വേ മന്ത്രി പീയുഷ് ഗോയല്. മനുഷ്യമനസ്സുകളെ മരവിപ്പിക്കുന്ന ഈ വീഡിയോ സമൂഹമാധ്യമങ്ങളില് വ്യാപകമായി പ്രചരിക്കുകയാണ്. ഓടുന്ന ട്രെയിനില് തൂങ്ങിക്കിടന്നുകൊണ്ട് ഒരു യുവാവ് നടത്തുന്ന അഭ്യാസങ്ങളാണ് വീഡിയോയുടെ ഉള്ളടക്കം. ട്രെയിനിന്റെ ഡോറിനടുത്തായി തൂങ്ങിക്കിടക്കുന്ന യുവാവ് നിലത്ത് കാല് മുട്ടിക്കാനുള്ള ശ്രമവും നടത്തുന്നത് കാണാം.
ഒറ്റക്കാലില് നിന്ന് അഭ്യാസം കാണിക്കുന്നതിനിടെ കാല് വഴുതി ഇയാള് ട്രെയിനിന്റെ ആടിയിലേക്ക് തെറിച്ച് വീണെങ്ങിലും നിസാര പരിക്കുകളോടെ രക്ഷപ്പെടുന്നതും വീഡിയോയില് കാണാം. ട്രെയിനിലെ യാത്രക്കാന് പകര്ത്തിയ വീഡിയോയില് ഇയാള് വീഴുന്നതുകണ്ട് ഞെട്ടുന്ന സഹയാത്രികരേയും കാണാം.
ഓടിക്കൊണ്ടിരിക്കുന്ന ട്രെയിനിലിരുന്ന് അഭ്യാസം കാണിക്കുന്നത് ധീരതയൊന്നുമല്ല, അത് വിഡ്ഢിയുടെ ലക്ഷണമാണെന്നും ഗോയല് വീഡിയോ പങ്കുവച്ചുകൊണ്ട് കുറിച്ചു. ജീവിതം അമൂല്യമാണ്, അത് അപകടത്തിലാക്കരുതെന്നും നിയമങ്ങള് പാലിച്ച് സുരക്ഷിതമായി യാത്ര ആസ്വദിക്കണമെന്നും മന്ത്രി കുറിക്കുന്നു. വീഡിയോ വൈറലായതോടെ നിരവധി പേരാണ് യുവാവിനെതിരെ രൂക്ഷ വിമര്ശനവുമായി രംഗത്തെത്തുന്നത്.
