തിരുവനന്തപുരം: കേരള പോലീസിന്റെ പുതിയ ഭക്ഷണക്രമത്തില് നിന്ന് ബീഫ് ഒഴിവാക്കി പിണറായി സര്ക്കാര്. സംസ്ഥാനത്തെ വിവിധ ക്യാംപുകള്ക്ക് നല്കാനായി തയാറാക്കിയ മെനുവിലാണ് ബീഫിനെ ഒഴിവാക്കിയത്. ബീഫ് ഒഴിവാക്കിയത് ആരോഗ്യവിദഗ്ധരുടെ നിര്ദേശപ്രകാരമുള്ള നടപടിയാണെന്ന് പോലീസ് വ്യക്തമാക്കി.
എല്ലാ ക്യാംപുകളിലേക്കും നല്കാനായി തൃശൂര് പോലീസ് അക്കാഡമിയില് തയാറാക്കിയ ഭക്ഷണക്രമത്തിലാണ് ബീഫ് നിരോധിച്ചത്. പുഴുങ്ങിയ മുട്ടയും മുട്ടക്കറിയും ചിക്കന് കറിയും തുടങ്ങി കഞ്ഞിയും സാമ്പാറും അവിയലും വരെ ഭക്ഷണക്രമത്തിലുണ്ട്. പക്ഷെ ഒരുനേരം പോലും ബീഫില്ല. ഇത് ആരോഗ്യമുള്ള ഭക്ഷണക്രമം തയാറാക്കിയ ഡോക്ടര്മാരുടെ നിര്ദേശപ്രകാരമാണ് നടപടിയെന്നും ബറ്റാലിയന് അധികൃതര് വ്യക്തമാക്കി. ബീഫ് ഒഴിവാക്കി കൊണ്ടുള്ള മെനു ട്രെയിനിംഗ് എഡിജിപി എല്ലാ ബറ്റാലിയനുകള്ക്കും നല്കിയിട്ടുണ്ട്.
