കണ്ണൂര്: കണ്ണൂര് യൂണിവേഴ്സിറ്റി സെനറ്റിന്റെ പ്രഥമ യോഗത്തില് അവതരിപ്പിക്കപ്പെട്ട രാഷ്ട്രീയ പ്രമേയത്തിനെതിരെ പ്രതിഷേധം ശക്തം. പൗരത്വനിയമ ഭേദഗതിക്കെതിരേയും സര്വകലാശാലകളിലെ വിദ്യാര്ത്ഥികള്ക്ക് നേരെ പോലീസ്, സംഘപരിവാര് സംഘടനകള് ഗുണ്ടാരാജ് നടപ്പാക്കുന്നുവെന്നുമുളള പ്രമേയത്തിനെതിരേയുമാണ് വ്യാപക പ്രതിഷേധം ഉയര്ന്നത്.
സിന്ഡിക്കേറ്റ് അംഗം ബിജു കണ്ടക്കൈയാണ് കഴിഞ്ഞ ദിവസം സെനറ്റ് യോഗത്തില് ഇതു സംബന്ധിച്ച് പ്രമേയം അവതരിപ്പിച്ചത്. യോഗത്തില് അധ്യക്ഷത വഹിച്ച വൈസ് ചാന്സലര് പ്രൊഫ. ഗോപിനാഥ് രവീന്ദ്രന്റെ സാന്നിധ്യത്തിലാണ് രാഷ്ട്രീയ പ്രമേയം അവതരിപ്പിച്ചത്. സര്വ്വകലാശാല പോലുളള ഉന്നത സ്ഥാപനങ്ങളുടെ ഭരണ സംവിധാനത്തിന്റെ ഭാഗമായ സെനറ്റ് പോലുളള സമിതികള് രാജ്യത്തെ ഭരണഘടനയെ വെല്ലുവിളിക്കുന്ന നിലപാടാണ് പ്രമേയത്തില് തെളിഞ്ഞതെന്ന ആരോപണമാണ് ഉയര്ന്നിരിക്കുന്നത്.
സര്വ്വകലാശാലയുടെ മേധാവിയായ വൈസ്ചാന്സിലറടക്കം പ്രമേയത്തെ അനുകൂലിച്ചു കൊണ്ട് യോഗത്തിലിരുന്നത് കടുത്ത അച്ചടക്ക ലംഘനമാണെന്ന ആരോപണവും ഉയര്ന്നിട്ടുണ്ട്. രാഷ്ട്രീയ സ്വാധീനമുപയോഗിച്ച് കഴിഞ്ഞ ഏതാനും വര്ഷങ്ങളായി സിപിഎം നേതാവായ സിന്ഡിക്കേറ്റ് അംഗത്തിന്റെ നേതൃത്വത്തില് വൈസ്ചാന്സിലറെ പോലും നോക്കുകുത്തിയാക്കി സര്വ്വകലാശാലയുടെ ഉദ്യോഗസ്ഥരേയും ഭരണത്തേയും നിയന്ത്രിക്കുകയും സര്വ്വകലാശാലയെ അപ്പാടെ മാര്ക്സിസ്റ്റ് വല്ക്കരിക്കാനുളള നീക്കമാണ് നടക്കുന്നത്. ഇതിന്റെ തുടര്ച്ചയാണ് സെനറ്റിന്റെ ഇന്നലത്തെ പ്രമേയവും എന്ന് വ്യക്തമാവുകയാണ്. ഇതിനെതിരെ ജീവനക്കാര്ക്കിടയിലും വിദ്യാര്ത്ഥികള്ക്കിടയിലും വ്യാപക പ്രതിഷേധം ഉയര്ന്നിട്ടുണ്ട്.
സെനറ്റ് അംഗങ്ങള് 65 ചോദ്യങ്ങള് ചോദിക്കുകയും എക്സ് ഒഫീഷ്യോ അംഗങ്ങള് മറുപടി പറയുകയും ചെയ്തു. മഹാത്മാ ഗാന്ധിയുടെ 72-ാമത് രക്തസാക്ഷി ദിനത്തോടനുബന്ധിച്ച് രണ്ട് മിനിട്ട് മൗനം ആചരിച്ചു. സ്റ്റാട്യൂറ്ററി ഫിനാന്സ് കമ്മിറ്റിയിലേക്ക് സെനറ്റ് പ്രതിനിധിയായി പി.ജെ. സാജുവിനെ തിരഞ്ഞെടുത്തു. സെനറ്റിന് കീഴിലെ വിവിധ ഉപസമിതികള് രൂപീകരിച്ചു. സര്വകലാശാലയില് ഗവേഷണം ചെയ്യുന്നവര്ക്ക് ഗൈഡിന്റെ റിട്ടയര്മെന്റിന് ശേഷം അതേ ഗൈഡിന് കീഴില് ഗവേഷണം പൂര്ത്തിയാക്കാന് സാധിക്കാത്ത സാഹചര്യത്തില് നിലിവിലെ ഉത്തരവ് പുനഃപരിശോധിക്കാനുള്ള നടപടികള് സ്വീകരിക്കാന് സെനറ്റംഗം ജോബി കെ. ജോസ് നല്കിയ പ്രമേയം അംഗീകരിച്ചു. പ്രൊ വൈസ് ചാന്സലര് ഡോ. പി.ടി. രവീന്ദ്രന്, രജിസ്ട്രാര് ഇന് ചാര്ജ് ഇ.വി.പി. മുഹമ്മദ്, എംഎല്എ സണ്ണി ജോസഫ്, മറ്റ് സെനറ്റ് അംഗങ്ങള് എന്നിവര് പങ്കെടുത്തു.
