ചാലക്കുടി: മാതൃശക്തി ഉണര്ന്നു പ്രവര്ത്തിച്ചാല് സമൂഹത്തിലെ മുഴുവന് പ്രശ്നങ്ങള്ക്കും പരിഹാരമാകുമെന്ന് വിദ്യാഭാരതി അഖില ഭാരതീയ ബാലിക ശിക്ഷാ പ്രമുഖ് സുശിരേഖ ചൂഡാസമ. ചാലക്കുടി വ്യാസ വിദ്യാനികേതനില് നടക്കുന്ന മാതൃഭാരതി സംസ്ഥാന സമ്മേളനം-ജാഗൃതി 2020 ഉദ്ഘാടനം ചെയ്യുകയായിരുന്നു അവര്.
നമ്മുടെ സംസ്കാരത്തിനനുസരിച്ച് പെണ്കുട്ടികളെ വളര്ത്തിയെടുക്കണം. പെണ്കുട്ടികള് ഇന്ന് ആണ്കുട്ടികളെ അനുകരിക്കാനാണ് ശ്രമിക്കുന്നത്. സമൂഹത്തില് സ്ത്രീകളും കുട്ടികളും ക്രൂരമായി ആക്രമിക്കപ്പെടുമ്പോള് ധര്മ്മത്തിന്റെ പക്ഷത്ത് നിന്ന് അതിനെതിരെ പോരാടാനുള്ള ഊര്ജ്ജവും ശക്തിയും പെണ്കുട്ടികള്ക്ക് നല്കണം. അത് സ്വന്തം അമ്മമാരില് നിന്ന് ലഭിക്കണം. വിദ്യാലയങ്ങളിലൂടെ സ്വയം സുരക്ഷയെക്കുറിച്ചെല്ലാം ബോധവത്ക്കരിക്കണം. ഭാരതീയ സംസ്കാരത്തെക്കുറിച്ച് പറയുമ്പോള് അതിന്റെ ശാസ്ത്രീയമായ കാര്യങ്ങള് കൂടി വിദ്യാര്ത്ഥികള്ക്ക് മനസ്സിലാക്കി കൊടുത്താലേ ലക്ഷ്യം പൂര്ണമാകൂ. വിദ്യാലയങ്ങള് പൂര്ണമായി പ്ലാസ്റ്റിക് വിമുക്തമാക്കണം. പ്ലാസ്റ്റിക് അടക്കമുള്ള വലിയ വെല്ലുവളികളെ നിര്മ്മാര്ജ്ജനം ചെയ്യാന് എല്ലാ അമ്മമാര്ക്കും സാധിക്കുമെന്നും രാഷ്ട്രത്തിന്റെ മുഖച്ഛായ മാറ്റി സമാജത്തെ ഉണര്ത്തുകയെന്ന ലക്ഷ്യമാണ് മാതൃഭാരതിയുടേതെന്നും സുശിരേഖ ചൂഡാസമ പറഞ്ഞു.
മാതൃഭാരതി സംസ്ഥാന അദ്ധ്യക്ഷ പ്രൊഫ. സുമതി ഹരിദാസ് അദ്ധ്യക്ഷയായി. ജനറല് കണ്വീനര് അഡ്വ. ജ്യോതി ഗോപിനാഥന്, മാതൃഭാരതി സംസ്ഥാന പ്രഭാരി ടി.എന്. രാമന്, ജില്ലാ പ്രസിഡന്റ് സൗമ്യ സുരേഷ്, വിദ്യാനികേതന് ജില്ലാ അദ്ധ്യക്ഷ സി.എന്. രാധ, സൗമ്യ വിശ്വനാഥ്, ജഗദ്ഗുരു ട്രസ്റ്റ് ചെയര്മാന് ജി. പത്മനാഭസ്വാമി, വൈസ് ചെയര്മാന്
പി.കെ. സുബ്രഹ്മണ്യന്, സെക്രട്ടറി കെ.പി.ഹരിദാസ്, വ്യാസ വിദ്യാനികേതന് സ്കൂള് മാനേജര് യു. പ്രഭാകരന്, പ്രിന്സിപ്പാള് എം.കെ. ശ്രീനിവാസന് തുടങ്ങിയവര് സംസാരിച്ചു. രണ്ടാംദിനത്തിലെ പരിപാടികള്ക്ക് അഗ്നി ഹോത്രത്തോടെയാണ് തുടക്കമായത്. യോഗ പരിശീലനം, വിവിധ വിഷയങ്ങളില് ക്ലിനിക്കല് സൈക്കോളജിസ്റ്റ് ഡോ. സൈലേഷ്യ, പോലീസ് സൈബര് സെല്ലിലെ ഒ.എ. ബാബു തുടങ്ങിയവര് ക്ലാസെടുത്തു.
റിട്ട. ഇന്കം ടാക്സ് കമ്മീഷണര് കെ. കിട്ടുനായര്, ഗിന്നസ് റെക്കോഡ് ജേതാവ് ലത ആര്. പ്രസാദ് എന്നിവര് വിശിഷ്ടാതിഥികളായി. മാതൃഭാരതി സംസ്ഥാന സമ്മേളനം ഇന്ന് സമാപിക്കും. രാവിലെ എട്ടിന് വിദ്യാഭാരതി ദക്ഷിണ ക്ഷേത്രിയ സംഘടന കാര്യദര്ശി എ.സി. ഗോപീനാഥ് സമാപന സഭ ഉദ്ഘാടനം ചെയ്യും.
