ബെംഗളൂരു: മംഗളൂരു രാജ്യാന്തര വിമാനത്താവളത്തില് ബോംബിന്റെ ഘടകങ്ങള് അടങ്ങിയ ബാഗ് കണ്ടെത്തിയ സംഭവത്തില് പ്രതി പോലീസ് സ്റ്റേഷനില് കീഴടങ്ങി. ഉഡുപ്പി മണിപ്പാല് സ്വദേശി ആദിത്യ റായി (36) ആണ് ഇന്നലെ രാവിലെ ബെംഗളൂരുവിലെ ഹലസൂരുവില് സംസ്ഥാന പോലീസ് മേധാവി (ഡിജിപി) നീലമണി രാജുവിന്റെ ഓഫീസില് ഹാജരായത്.
ഹലസൂരു സര്ക്കിള് ഇന്സ്പെക്ടര് ആദിത്യ റായിയുടെ അറസ്റ്റ് രേഖപ്പെടുത്തി. എംബിഎ ബിരുദധാരിയായ ഇയാള് വിമാനത്താവളത്തില് സുരക്ഷാ ജീവനക്കാരനായി ജോലി ലഭിക്കാത്തതിലുള്ള വൈരാഗ്യത്തിലാണ് ബോംബു വച്ചതെന്നും ഓണ്ലൈനിലൂടെയാണ് ബോംബു നിര്മാണത്തിനുള്ള സാമഗ്രികള് ശേഖരിച്ചതെന്നും പോലീസിന് മൊഴി നല്കി.
ബെംഗളൂരു രാജ്യാന്തര വിമാനത്താവളത്തിലും കെഎസ്ആര് റെയില്വെ സ്റ്റേഷനിലും ബോംബു വച്ചിട്ടുണ്ടെന്ന് ഭീഷണിപ്പെടുത്തി ഫോണ് ചെയ്തതിന് നേരത്തെ ഇയാള് അറസ്റ്റിലായിട്ടുണ്ട്. ഈ കേസില് ഒരു വര്ഷത്തെ ജയില് ശിക്ഷയ്ക്കു ശേഷം മൂന്നു മാസം മുന്പാണ് പുറത്തിറങ്ങിയത്. ഇയാള്ക്ക് മാനസിക അസ്വാസ്ഥ്യമുള്ളതായി സംശയമുണ്ടെന്നും മൊഴി പരിശോധിച്ചു വരികയാണെന്നും പോലീസ് പറഞ്ഞു. മംഗളൂരു ബോംബ് കേസ് അന്വേഷിക്കുന്ന പ്രത്യേക പോലീസ് സംഘം ബെംഗളൂരുവിലെത്തി പ്രതിയെ ചോദ്യം ചെയ്തു. പ്രതിയെ മംഗളൂരു പോലീസ് കസ്റ്റഡിയില് വാങ്ങി.
മംഗളൂരുവില് ബോംബ് കണ്ടെത്തിയതിനു ശേഷം നടത്തിയ സിസിടിവി പരിശോധനയില് ഓട്ടോറിക്ഷയില് എത്തിയ ആളാണ് ബോംബു വച്ചതെന്ന് കണ്ടെത്തിയിരുന്നു. തിരിച്ചറിയുന്നതിനായി ഇയാളുടെ ചിത്രം പോലീസ് പുറത്തുവിട്ടിരുന്നു. ഓട്ടോറിക്ഷ ഡ്രൈവറും പ്രതിയെ തിരിച്ചറിഞ്ഞ ചിലരും ആദിത്യയെക്കുറിച്ചുള്ള വിവരം പോലീസിന് നല്കിയിരുന്നു. ഇതോടെ ബുധനാഴ്ച വൈകിട്ട് ആദിത്യറായിയുടെ കുടുംബാംഗങ്ങളെ പോലീസ് കസ്റ്റഡിയിലെടുത്തു. ഇതോടെയാണ് ഇയാള് കീഴടങ്ങാന് തയാറായതെന്നാണ് വിവരം.
2018 ആഗസ്റ്റ് 20, 27 തീയതികളിലാണ് ബെംഗളൂരു വിമാനത്താവളത്തിലേക്ക് ബോംബു വച്ചിട്ടുണ്ടെന്ന് ഭീഷണിപ്പെടുത്തി ഫോണ് വിളിച്ചത്. ആഗസ്റ്റ് 29ന് കെഎസ്ആര് റെയില്വെ സ്റ്റേഷനില് ബോംബുവച്ചതായും ഫോണ് വിളിച്ചു. ഫോണ് നമ്പര് കേന്ദ്രീകരിച്ച് നടത്തിയ അന്വേഷണത്തില് ആദിത്യ റായി അറസ്റ്റിലായിരുന്നു. 2017-ല് ജോലി നോക്കിയിരുന്ന സ്വകാര്യ ഇന്ഷ്വറന്സ് കമ്പനിയില് നിന്ന് ലാപ് ടോപ്പ് മോഷ്ടിച്ചതിന് മൂന്നു മാസത്തെ ജയില് ശിക്ഷ അനുഭവിച്ചിരുന്നു. കുറ്റം ചെയ്യുന്നത് ആരായാലും അവര് ശിക്ഷിക്കപ്പെടുമെന്നും ആഭ്യന്തരമന്ത്രി ബസവരാജ് ബൊമ്മൈ പറഞ്ഞു.
