ന്യൂദല്ഹി: കോണ്ഗ്രസ് ജനറല് സെക്രട്ടറി പ്രിയങ്ക ഗാന്ധിയുടെ ഭര്ത്താവ് റോബര്ട്ട് വാദ്രയുടെ ബിസിനസ് പങ്കാളിയും മലയാളി വ്യവസായിയുമായ സി.സി. തമ്പിക്കെതിരെ എന്ഫോഴ്സ്മെന്റ് അന്വേഷണം ശക്തമാക്കുന്നു. തമ്പിയെ ചോദ്യം ചെയ്തതില് വ്യത്യസ്തമായ മൊഴികളാണ് നല്കിയിരിക്കുന്നത് ഇതിന്റെ അടിസ്ഥാനത്തിലാണ് നടപടി വ്യാപിപ്പിക്കുന്നത്.
വാദ്രയെ പരിചയപ്പെട്ടത് എപ്പോള് എന്ന ചോദ്യത്തിന് ആദ്യം സോണിയയുടെ പിഎ പരിചയപ്പെടുത്തി നല്കിയതാണെന്നാണ് തമ്പി എന്ഫോഴ്സ്മെന്റ് മുമ്പാകെ അറിയിച്ചത്. എന്നാല് 2019 ഫെബ്രുവരി ആറിന് എന്ഫോഴ്സ്മെന്റ് മുമ്പാകെ ആദ്യം നല്കിയ മൊഴിയില് എമിറേറ്റ്സ് വിമാനത്തില് വെച്ചാണ് കണ്ടുമുട്ടിയത് എന്ന് അറിയിച്ചത്. അതിനാല് കള്ളപ്പണക്കേസില് വാദ്രയുമായി ഇയാള്ക്ക് കൂടുതല് പങ്കാളിത്തം ഉണ്ടോയെന്ന് എന്ഫോഴ്സ്മെന്റ് വിശദമായി അന്വേഷണം നടത്തും.
അതേസമയം രാജസ്ഥാനിലെ ബിക്കാനീര് ഭൂമി ഇടപാടിലെ ക്രമക്കേടില് സോണിയയുടെ മരുമകനും പ്രിയങ്കയുടെ ഭര്ത്താവുമായ റോബര്ട്ട് വാദ്രയ്ക്ക് വ്യക്തമായ പങ്കുണ്ടെന്ന് എന്ഫോഴ്സ്മെന്റ് സൂചന നല്കി. വാദ്രയും വാദ്രയുടെ കമ്പനി സ്കൈലൈറ്റ് ഹോസ്പിറ്റാലിറ്റിയും ഭൂമി വാങ്ങാന് ചെക്ക് നല്കിയതില് കുഴപ്പങ്ങളുണ്ടെന്നും എന്ഫോഴ്സ്മെന്റിന്റെ റിപ്പോര്ട്ടില് പറയുന്നു.
ബിക്കാനീറില് രണ്ട് വസ്തുക്കളാണ് ഇവര് വാങ്ങിയത്. കമ്പനിയുടെ ആവശ്യപ്രകാരമെന്നു പറഞ്ഞ് ഭൂ ഉടമകള്ക്ക് വെറുതെ ചെക്കുകള് നല്കുകയായിരുന്നു. ഇക്കാര്യത്തില് നടപടികളൊന്നും പാലിച്ചില്ല. 2009ല് ഒരു അശോക്കുമാറിന് വാദ്രയുടെ കമ്പനി ചെക്കുകള് നല്കി. ആ സമയത്ത് അശോക്കുമാര് ഭൂ ഉടമയല്ല. ഇയാള്ക്ക് മുക്ത്യാര് (പവര് ഓഫ് അറ്റോര്ണി) നല്കിയിട്ടുമില്ല. ചെക്ക് നല്കി ഒന്പതു ദിവസം കഴിഞ്ഞാണ് വസ്തു ക്രയവിക്രയം ചെയ്യാനുള്ള അധികാരം ഇയാള്ക്ക് നല്കിയത്.
രാജേന്ദ്രകുമാര് എന്നയാളാണ് ഭൂമി ഉടമസ്ഥന് എന്നാണ് രേഖകളില്. എന്നാല്, താന് ആര്ക്കും ഭൂമി നല്കുകയോ ഭൂമി വില്ക്കാനുള്ള അവകാശം എഴുതി നല്കുകയോ ചെയ്തിട്ടില്ലെന്ന് ഇയാള് പറയുന്നു. താന് ഭൂമി വില്ക്കുകയോ ആര്ക്കെങ്കിലും മുന്കൂര് പണം നല്കുയോ ചെയ്തിട്ടില്ലെന്ന് അശോക്കുമാറും പറയുന്നു. എന്നാല്, വാദ്രയുടെ കമ്പനി പറഞ്ഞ പ്രകാരമാണ് തന്റെ പേരില് മുക്ത്യാര് എഴുതിയതെന്ന് ഇയാള് പറഞ്ഞു. ഇക്കാര്യങ്ങള് ഇടപാടുകളിലെ ക്രമക്കേടാണ് കാണിക്കുന്നത്.
രാജസ്ഥാനിലെ ഗജ്നീറിലും ബിക്കാനീറിലുമുള്ള വസ്തുക്കള് വാദ്രയുടെ സ്കൈലൈറ്റ് ഹോസ്പിറ്റാലിറ്റി എന്ന കമ്പനി 2009 ഡിസംബറിലാണ് വെറും 72 ലക്ഷം രൂപയ്ക്ക് വാങ്ങിയത്. മൂന്നു വര്ഷം കഴിഞ്ഞ് ഇവ 5.15 കോടിക്ക് വിറ്റു. ഈ പണം കൊണ്ടാണ് വാദ്ര ദല്ഹിയിലെ സുഖ്ദേവ് നഗറിലുള്ള ബംഗ്ലാവ് വാങ്ങിയത്. ഈ വീട് എന്ഫോഴ്സ്മെന്റ് നേരത്തെ കണ്ടുകെട്ടിയിരുന്നു.
