തൃശൂർ: സർക്കാരും ഗവർണറും തമ്മിൽ ഏറ്റുമുട്ടലിനില്ലായെന്ന് മന്ത്രി എ.കെ.ബാലൻ. നിലവിലുള്ളത് നിയമപരമായ പോരാട്ടമെന്നും മന്ത്രി ബാലൻ. പൗരത്വ നിയമഭേദഗതി വിഷയം ശരിയെന്ന് സുപ്രീം കോടതി പറഞ്ഞാൽ സർക്കാർ എതിർപ്പ് പറയില്ലെന്നും അദ്ദേഹം വ്യക്തമാക്കി. ഇക്കാര്യത്തിൽ നേരത്തെ രണ്ടു തവണ പ്രതികരിച്ചതാണെന്നും കൂടുതലായി ഒന്നും പറയാനില്ലെന്നും അദ്ദേഹം കൂട്ടിച്ചേർത്തു.
വാർഡ് വിഭജന വിഷയം എൽഡിഫിനു ജയിക്കാനാണെന്ന ആരോപണത്തിൽ കഴമ്പില്ല. യുഡിഎഫ് ഭരണകാലത്ത് യുഡിഎഫ് അവർക്ക് അനുകൂലമായ വിഭജനം നടത്തിയപ്പോഴും അവിടെ ജയിച്ചത് എൽഡിഎഫ് ആയിരുന്നുവെന്ന് ഓർക്കണമെന്നും മന്ത്രി ബാലൻ പറഞ്ഞു. രാഷ്ട്രീയ നേട്ടത്തിനായി നടത്തിയ വാർഡ് വിഭജനത്തിൽ അന്ന് കിടപ്പുമുറി പോലും വിഭജിച്ചു. വീട്ടിലെ കക്കൂസ് ഒരു ഭാഗത്തും വീട് മറ്റൊരുഭാഗത്തുമായെന്നും മന്ത്രി പറഞ്ഞു.
വാർഡ് വിഭജനത്തിൽ നിലവിൽ വിവാദങ്ങളുടെ ആവശ്യമില്ല. എൽഡിഎഫിന് വേണ്ടിയുള്ള വിഭജനമല്ലെന്നും ജനസംഖ്യാ ആനുപാതികമായ വിഭജനമാണ് നടക്കുന്നതെന്നും അദ്ദേഹം വ്യക്തമാക്കി.
