ന്യൂദല്ഹി: പൗരത്വ ഭേദഗതി നിയമത്തിനെതിരെ സുപ്രീംകോടതിയില് അപ്പീല് നല്കിയതുമായി ബന്ധപ്പെട്ട് സംസ്ഥാന സര്ക്കാരിനെ കേരള ഗവര്ണര് ആരിഫ് മുഹമ്മദ് ഖാന് വിമര്ശിച്ചതിനെ പിന്തുണച്ച് കേന്ദ്രമന്ത്രി വി മുരളീധരന്. ഭരണഘടന ചോദ്യം ചെയ്യപ്പെടുന്നിടത്ത് ഇടപെടുകയെന്ന കര്ത്തവ്യമാണ് ഗവര്ണര് ആരിഫ് മുഹമ്മദ് ഖാന് നിര്വഹിക്കുന്നതെന്ന് വി മുരളീധരന് ഫേസ്ബുക്കില് കുറിച്ചു. ഭരണഘടന അനുസരിച്ചേ മതിയാകൂവെന്നും മുഖ്യമന്ത്രി ചോദിച്ചുവാങ്ങിയ അടിയാണിതെന്നും നിന്നുകൊള്ളാതെ പിണറായിക്ക് മറ്റു വഴിയില്ലെന്നും മുരളീധരന് പറഞ്ഞു.
ഭരണഘടനയെന്തെന്നും ആരിഫ് മുഹമ്മദ് എന്ന കേരള ഗവര്ണര് ആരെന്നും പിണറായി വിജയന് ശരിക്ക് മനസിലാക്കാന് പോകുന്നതേയുള്ളൂ! സര്ക്കാരിന് റൂള്സ് ഓഫ് ബിസിനസ് അറിയില്ലെങ്കില് പഠിപ്പിച്ചിരിക്കും!! മുഖ്യമന്ത്രിക്കിനി വിശദീകരിക്കാതെ തരമില്ല വി മുരളീധരന് ട്വീറ്റ് ചെയ്തു.
ഫേസ്ബുക്ക് കുറിപ്പ്-
നിയമം,ഭരണഘടന… ഇതു രണ്ടും അറിയാവുന്ന ഗവര്ണര്. ആ ഗവര്ണറോട് തര്ക്കിക്കാന് ചെന്ന മുഖ്യമന്ത്രി പിണറായി വിജയന് ഇപ്പോ ഏതു നേരത്ത് തോന്നിയ ബുദ്ധിയാണിതെന്ന് വിലപിക്കുന്നുണ്ടാവും. ഒരുപാട് ഉപദേശകരെ അണിനിരത്തിയിട്ട് ഒരു കാര്യവുമില്ലെന്ന് ഇപ്പോള് മനസിലായില്ലേ ശ്രീ പിണറായി? സര്ക്കാരിനോട് വിശദീകരണം തേടുമെന്ന് റൂള്സ് ഓഫ് ബിസിനസ് വായിച്ചു കേള്പ്പിച്ചാണ് ഗവര്ണര് പറഞ്ഞത്.
ഭരണഘടന ചോദ്യചെയ്യപ്പെടുന്നിടത്ത് ഇടപെടുകയെന്ന കര്ത്തവ്യമാണ് ഗവര്ണര് നിര്വഹിക്കുന്നത്.മുഖ്യമന്ത്രി ഭരണഘടന അനുസരിച്ചേ മതിയാകൂ. ചോദിച്ചു വാങ്ങിയ പ്രഹരമാണ്. നിന്നുകൊള്ളാതെ പിണറായിക്ക് മറ്റ് വഴിയില്ല…
