കോട്ടയം: സിഎംഎസ് കോളേജില് എസ്എഫ്ഐ ഗൂണ്ടായിസത്തിനെതിരെ വിദ്യാര്ത്ഥികളുടെ പ്രതിഷേധകൂട്ടായ്മ രംഗത്ത്. സിഎംഎസ് കോളേജിലെ ഫിസിക്സ് വിഭാഗം വിദ്യാര്ത്ഥിയെ എസ്എഫ്ഐ പ്രവര്ത്തകര് മര്ദ്ദിച്ചു എന്ന് ആക്ഷേപിച്ചു കൊണ്ടാണ് പ്രതിഷേധം ആരംഭിച്ചത്. വ്യാഴ്ച വൈകിട്ട് എസ്എഫ്ഐ യൂണിയന് ഭാരവാഹികളുടെ ഒത്താശയോടെ പുറത്ത് നിന്ന് എത്തിയവരാണ് മര്ദനത്തിനു നേതൃത്വം നല്കിയത്. വിദ്യാര്ഥിയെ മര്ദ്ദിച്ച എസ്എഫ്ഐ പ്രവര്ത്തകരെ കോളേജിനുള്ളിലേക്ക് പ്രവേശിപ്പിക്കരുതെന്നാവശ്യപ്പെട്ട് പെണ്കുട്ടികടക്കം കോളേജ് ഗേറ്റിനു മുന്നില് മതില് തീര്ത്തു. ഇതോടെ സംഘര്ഷം ഉടലെടുത്തു. തുടര്ന്ന് വിദ്യാര്ത്ഥി കൂട്ടായ്മ കോളേജ് കവാടത്തിന് മുന്നില് കുത്തിയിരുന്നു പ്രതിഷേധിച്ചു.
സംഘര്ഷത്തെത്തുടര്ന്ന് എസ്എഫ്ഐയുടെ കോളേജിലെ യൂണിറ്റ് സെക്രട്ടറിയെയടക്കം പൊലീസ് വാഹനത്തില് കയറ്റിയിരിക്കുകയാണ്. ഇതിനെതിരെ എസ്എഫ്ഐ വിദ്യാര്ത്ഥികളും പ്രതിഷേധവുമായി രംഗത്തെത്തി. കോളേജിന്റെ പുറത്ത് നിന്നെത്തിയവരാണ് പ്രശ്നങ്ങളുണ്ടാക്കിയതെന്നും ഇവര് കഞ്ചാവ് മാഫിയയുമായി ബന്ധമുള്ളവരാണെന്നാണ് എസ്എഫ്ഐ ആരോപിക്കുന്നത്.
