കോട്ടയം: ശബരിമല സന്നിധാനത്ത് ക്രൂരമായ മര്ദനമുറകള് അഴിച്ചുവിട്ട് അയ്യപ്പഭക്തര്ക്കുമേല് നരനായാട്ടിനു നേതൃത്വം നല്കിയ പോലീസ് സ്പെഷ്യല് ഓഫീസര് സുജിത് ദാസ്, മറ്റ് പോലീസ് ഉദ്യോഗസ്ഥര് എന്നിവര്ക്കെതിരെ കര്ശന നടപടി സ്വീകരിക്കണമെന്ന് ഹിന്ദു ഐക്യവേദി സംസ്ഥാന ജനറല് സെക്രട്ടറി ഇ.എസ്. ബിജു ആവശ്യപ്പെട്ടു.
തിരുവാഭരണപേടക വാഹക സംഘാംഗങ്ങള്, പള്ളിവേട്ട സംഘം, ദേവസ്വം ബോര്ഡ് പ്രത്യേക തിരിച്ചറിയല് രേഖ നല്കിയ തീര്ഥാടകര്, ദേവസ്വം സുരക്ഷ ഉദ്യോഗസ്ഥര്, സന്നദ്ധ സംഘടനാ പ്രവര്ത്തകര്, മാധ്യമ പ്രവര്ത്തകര് എന്നിവരടക്കം പോലീസിന്റെ ക്രൂരമര്ദനത്തിനിരയായി. ഭക്തിയും, വിശ്വാസവും ഇല്ലാത്ത പോലീസ് ഉദ്യോഗസ്ഥരെയാണ് ഇത്തവണ സന്നിധാനം ഡ്യൂട്ടിക്ക് നിയോഗിച്ചത്. കഠിനമായ വ്രതം നോറ്റ് ശബരിമല തീര്ഥാടനത്തിലെ ആചാരങ്ങള് അനുഷ്ഠിക്കുന്ന വിവിധ സംഘങ്ങള്ക്ക് യാതൊരു പരിഗണനയും സംരക്ഷണവും നല്കുവാന് ദേവസ്വം ബോര്ഡും ഉദ്യോഗസ്ഥരും തയാറായില്ല. ശബരിമലയെ തീര്ഥാടന കേന്ദ്രമായി കാണാതെ സര്ക്കാരിന് ലാഭം ഉണ്ടാക്കുന്ന മാര്ക്കറ്റായി കാണാനാണ് സര്ക്കാര് ശ്രമിച്ചതെന്നും അദ്ദേഹം ആരോപിച്ചു.
