മുംബൈ: മഹാരാഷ്ട്ര ത്രികക്ഷി സര്ക്കാരില് വീണ്ടും പൊട്ടിത്തെറികള്. ശിവസേനാ നേതാവ് അബ്ദുള് സത്താര് മന്ത്രിസഭയില് നിന്നും രാജിവെച്ചു. ക്യാബിനറ്റ് മന്ത്രിസ്ഥാനം നല്കാത്തതിനെ തുടര്ന്നാണ് രാജിയെന്നാണ് റിപ്പോര്ട്ടുകള്.
ഉദ്ധത് താക്കറെ സത്താറിനെ മന്ത്രിസഭയില് ഉള്പ്പെടുത്തിയിരുന്നെങ്കിലും സഹ മന്ത്രിസ്ഥാനമാണ് നല്കിയിരുന്നത്. ഇതിനെ തുടര്ന്നാണ് ഇയാള് രാജിവെച്ചൊഴിഞ്ഞത്.
ഡിസംബര് 30-നാണ് അബ്ദുള് സത്താര് അടക്കമുള്ള നേതാക്കള് മന്ത്രിമാരായി സത്യപ്രതിജ്ഞ ചെയ്തത്. എന്നാല് വകുപ്പ് വിഭജനത്തില് തീരുമാനമാകാത്തത് മഹാവികാസ് അഘാഡിയില് പ്രതിസന്ധി സൃഷ്ടിച്ചിരുന്നു.
അബ്ദുള് സത്താറിന് മന്ത്രിസ്ഥാനം നല്കിയതിനെതിരെ ബിജെപി പ്രതിഷേധിച്ചിരുന്നു. അധോലോക നേതാവ് ദാവൂദ് ഇബ്രാഹിമുമായി അടുത്ത ബന്ധമുള്ള വ്യക്തിയാണ് അബ്ദുള് സത്താറെന്നും ബാല് താക്കറെ ഇക്കാര്യം അറിയിച്ചിട്ടുണ്ടെന്നുമാണ് ബിജെപി അറിയിച്ചത്.
സിലോദ് നിയോജക മണ്ഡലത്തില്നിന്ന് മൂന്ന് തവണ നിയമസഭയിലെത്തിയ അബ്ദുള് സത്താര് 2014-ല് കോണ്ഗ്രസ്- എന്സിപി സര്ക്കാരിലും മന്ത്രിയായിരുന്നു. എന്നാല് ഇത്തവണ നിയമസഭ തിരഞ്ഞെടുപ്പിന് തൊട്ടുമുമ്പ് കോണ്ഗ്രസ് വിട്ട അദ്ദേഹം ശിവസേനയില് ചേരുകയായിരുന്നു.
അതേസമയം മന്ത്രിസഭാ പുനഃസംഘടനയ്ക്കുശേഷം സംസ്ഥാന എന്സിപി, കോണ്ഗ്രസ് നേതൃത്വങ്ങള്ക്കുള്ളിലും രണ്ട് അഭിപ്രായങ്ങള് ഉടലെടുത്തിട്ടുണ്ട്. അര്ഹതയുള്ളവരില് പലരേയും മാറ്റി നിര്ത്തിയെന്നും, താത്പ്പര്യമുള്ളവര്ക്ക് മാത്രം മന്ത്രിസ്ഥാനം നല്കിയെന്നുമാണ് പരാതി. കൂടാതെ പ്രമുഖ നേതാക്കളില് പലരും പാര്ട്ടി വിടുകയും രാഷ്ട്രീയ പ്രവര്ത്തനങ്ങളില് നിന്നും പിന്മാറുകയും ചെയ്തിട്ടുണ്ട്. ശിവസേനയുമായി സര്ക്കാര് രൂപീകരിക്കുന്നതില് പല എന്സിപി കോണ്ഗ്രസ് പ്രവര്ത്തകരും പരസ്യമായി എതിര്പ്പ് പ്രകടിപ്പിച്ചതാണ്. തീവ്ര മനോഭാവമുള്ളവരുമായി സര്ക്കാര് രൂപീകരിക്കേണ്ട എന്നായിരുന്നു ഇവരുടെ വാദം.
