പത്തനംതിട്ട: ഭക്തസഹസ്രങ്ങള് ശരണമന്ത്ര മലരുകളാല് ഒരുക്കിയ പുഷ്പപാതയിലൂടെ ശബരിമല മണ്ഡലപൂജയ്ക്ക് അയ്യപ്പ വിഗ്രഹത്തില് ചാര്ത്തുന്ന തങ്കഅങ്കിയും വഹിച്ചുള്ള രഥഘോഷയാത്ര ആറന്മുള പാര്ഥസാരഥി ക്ഷേത്രത്തില് നിന്നാരംഭിച്ചു. ഇന്നലെ രാവിലെ ഏഴിന് ആറന്മുളയില് നിന്ന് രഥം പുറപ്പെട്ടു.
ആറന്മുള ക്ഷേത്രത്തിന്റെ സ്ട്രോങ് റൂമില് സൂക്ഷിച്ചിരുന്ന തങ്കഅങ്കി നേരത്തെ ദേവസ്വം അധികാരികള് ഏറ്റുവാങ്ങി ക്ഷേത്രത്തില് ദര്ശനത്തിനു വച്ചിരുന്നു. തുടര്ന്ന് സായുധ പോലീസിന്റെ അകമ്പടിയില് പുറത്തേക്ക് എഴുന്നള്ളിച്ചു. പിന്നീട് രഥപ്രയാണം ആരംഭിച്ചു. വിവിധയിടങ്ങളിലെ സ്വീകരണങ്ങള് ഏറ്റുവാങ്ങി ഘോഷയാത്ര 26ന് വൈകിട്ട് സന്നിധാനത്തെത്തും. തിരുവിതാംകൂര് മഹാരാജാവായിരുന്ന ചിത്തിര തിരുനാള് ബാലരാമ വര്മയാണ് മണ്ഡലപൂജയ്ക്കു ചാര്ത്തുന്നതിനുള്ള 450 പവന് തൂക്കമുള്ള തങ്കഅങ്കി 1973ല് നടയ്ക്കു വച്ചത്.
ഇന്നലെ രാവിലെ ആറന്മുളയില് നിന്ന് പുറപ്പെട്ട രഥഘോഷയാത്ര വിവിധയിടങ്ങളിലെ സ്വീകരണത്തിനുശേഷം രാത്രി ഓമല്ലൂര് ശ്രീരക്തകണ്ഠ സ്വാമി മഹാക്ഷേത്രത്തില് വിശ്രമിക്കും. ഇന്ന് രാവിലെ എട്ടിന് ഓമല്ലൂര് ക്ഷേത്രത്തില് നിന്നു പുറപ്പെടും. രാത്രിയില് കോന്നി മുരിങ്ങമംഗലം മഹാദേവ ക്ഷേത്രത്തിലെത്തും. 25ന് രാത്രി റാന്നി-പെരുനാട് ധര്മശാസ്താ ക്ഷേത്രത്തില് തങ്ങും. 26ന് രാവിലെ പെരുനാട്ടില് നിന്നു പുറപ്പെട്ട് ളാഹ, പ്ലാപ്പള്ളി, ഇലവുങ്കല്, നിലയ്ക്കല്, ചാലക്കയം വഴി ഉച്ചയ്ക്ക് പമ്പയിലെത്തും.
ത്രിവേണിയില് നിന്നു സ്വീകരിച്ച് പമ്പ ഗണപതികോവിലിലെത്തിക്കുന്ന തങ്കഅങ്കി അവിടെ ദര്ശനത്തിനു വയ്ക്കും. വൈകിട്ട് മൂന്നിന് പമ്പയില് നിന്നു സന്നിധാനത്തേക്ക് ഭക്തര് ശിരസിലേറ്റി കൊണ്ടുപോകും. വൈകിട്ട് അഞ്ചിന് ശരംകുത്തിയിലെത്തും. അവിടെ നിന്നു സ്വീകരിച്ച് ആഘോഷമായി സന്നിധാനത്തെത്തിച്ച് അയ്യപ്പ വിഗ്രഹത്തില് ചാര്ത്തി ദീപാരാധന നടക്കും. 27നു മണ്ഡലപൂജയുടെ സമയത്തും തങ്കഅങ്കി ചാര്ത്തും.
ആറന്മുള പാര്ഥസാരഥി ക്ഷേത്രത്തില് ദേവസ്വം ബോര്ഡ് പ്രസിഡന്റ് എന്. വാസു, അംഗങ്ങളായ എന്. വിജയകുമാര്, കെ.എസ്. രവി, കമ്മീഷണര് ബി.എസ്. തിരുമേനി, മുന് പ്രസിഡന്റ് എ. പത്മകുമാര്, ജില്ലാ പോലീസ് മേധാവി ജി. ജയദേവ് തുടങ്ങിയവര് സന്നിഹിതരായിരുന്നു. എആര് ക്യാമ്പില് നിന്നുള്ള പോലീസിന്റെ സായുധസംഘമാണ് ഘോഷയാത്രയ്ക്ക് സുരക്ഷയൊരുക്കുന്നത്.
