തിരുവനന്തപുരം: ഈ മാസം 26ന് സൂര്യഗ്രഹണം ജനങ്ങള്ക്ക് വീക്ഷിക്കാന് വിപുലമായ സൗകര്യങ്ങളുമായി കേരള ശാസ്ത്ര സാങ്കേതിക മ്യൂസിയം പ്ലാനിറ്റോറിയം. തിരുവനന്തപുരത്ത് സെന്ട്രല് സ്റ്റേഡിയത്തിലും കോട്ടയത്ത് ദേവമാതാ കോളേജ് ഗ്രൗണ്ടിലും ചാലക്കുടിയിലെ പനംമ്പള്ളി മെമ്മോറിയല് കോളേജ് ഗ്രൗണ്ടിലും നാദാപുരത്ത് രാജാസ് ഹയര് സെക്കന്ററി സ്കൂള് ഗ്രൗണ്ടിലുമാണ് ഗ്രഹണ നിരീക്ഷണ ഉപകരണങ്ങള് പ്ലാനിറ്റോറിയത്തിന്റെ ആഭിമുഖ്യത്തില് സജ്ജമാക്കുന്നതെന്ന് മ്യൂസിയം ഡയറക്ടര് അരുള് ജെറാള്ഡ് പ്രകാശ് വാര്ത്താ സമ്മേളനത്തില് പറഞ്ഞു.
രാവിലെ എട്ടിന് ആരംഭിച്ച് 11ന് വരെയാണ് ഗ്രഹണ സമയം. 9.26നും 9.30നും ഇടയിലുള്ള സമയത്താണ് പൂര്ണ ഗ്രഹണം. കോഴിക്കോട്, കാസര്കോഡ്, കണ്ണൂര്, വയനാട് ജില്ലകളിലാണ് പൂര്ണ വലയ സൂര്യഗ്രഹണം ദൃശ്യമാവുക. ബാക്കി ജില്ലകളില് ഭാഗിക ഗ്രഹണം മാത്രമേ ദൃശ്യമാകുകയുള്ളൂ. തിരുവനന്തപുരത്ത് 9.30നും കോട്ടയത്ത് 9.29നുംനാദാപുരത്ത് 9.26നും ചാലക്കുടിയില് 9.28നും ഗ്രഹണം അതിന്റെ പാരമ്യത്തിലെത്തും.
പ്ലാനിറ്റോറിയത്തിന്റെ ആഭിമുഖ്യത്തില് സജ്ജമാക്കിയിട്ടുള്ളിടത്ത് വിദ്യാര്ത്ഥികള്ക്കും, മുതിര്ന്നവര്ക്കും സൗജന്യമായി ഗ്രഹണം നിരീക്ഷിക്കാന് സാധിക്കും. ഗ്രഹണം സുരക്ഷിതമായി വീക്ഷിക്കാന് ടെലിസ്കോപ്പ്, സോളാര് ഫില്ട്ടറുകള്, സോളാര് കണ്ണടകള്, പിന്ഹോള് ക്യാമറ എന്നിവയും ഇവിടങ്ങളില് സജ്ജമാക്കും. അംഗീക്യത ഫില്ട്ടര് ഉപയോഗിച്ചോ പ്രൊജക്ഷന് സംവിധാനം ഉപയോഗിച്ചോ അല്ലാതെ നഗ്നനേത്രങ്ങള് കൊണ്ട് ഒരു കാരണവശാലും സൂര്യഗ്രഹണം നിരീക്ഷിക്കരുത്.
നാല്പതിനായിരം പേര്ക്ക് സുരക്ഷിതമായി സൂര്യഗ്രഹണം കാണാനുള്ള സജ്ജീകരണങ്ങള് അവസാനഘട്ടത്തിലാണ്. കൂടാതെ ശാസ്ത്ര വിദഗ്ധരുടെ ക്ലാസുകളും സംശയ നിവാരണത്തിനുള്ള സൗകര്യവും ലഭിക്കും. 2031 മെയ് 21നാണ് അടുത്ത വലയഗ്രഹണം. പത്രസമ്മേളനത്തില് സുരേഷ് കുമാര്, പി.പി. രാജീവ്, സിറില് കെ. ബാബു എന്നിവര് പങ്കെടുത്തു.
