കോഴിക്കോട്: രാഷ്ട്രമാണ് പ്രധാനം രാഷ്ട്രീയ മുതലെടുപ്പല്ല എന്ന സന്ദേശവുമായി കോഴിക്കോട്ട് എബിവിപിയുടെ സ്വാഭിമാനറാലി. ദേശീയ പൗരത്വ നിയമത്തിനെതിരെ രാജ്യത്ത് നടക്കുന്ന തെറ്റിദ്ധാരണാജനകമായ പ്രചരണങ്ങള്ക്കും പ്രതിഷേധങ്ങള്ക്കും എതിരെയായിരുന്നു സ്വാഭിമാനറാലി. കൂറ്റന് ത്രിവര്ണ പതാകയേന്തി നഗരവീഥികളിലൂടെ വിദ്യാര്ത്ഥികള് നടന്നു നീങ്ങിയപ്പോള് അത് ദേശസ്നേഹികള്ക്ക് കരുത്തുപകരുന്നതായി.
കോഴിക്കോട് പുതിയ ബസ് സ്റ്റാന്റ് പരിസരത്ത് നിന്ന് ആരംഭിച്ച റാലി നഗരം ചുറ്റി കിഡ്സണ് കോര്ണറില് സമാപിച്ചു. എബിവിപി സംസ്ഥാന സെക്രട്ടറി എം.എം. ഷാജി റാലിയുടെ സമാപനസമ്മേളനം ഉദ്ഘാടനം ചെയ്തു. കപട മതേതരവാദികള് നടത്തുന്ന ആസൂത്രിതമായ വ്യാജപ്രചരണങ്ങളാണ് ദേശീയ പൗരത്വ ഭേദഗതി നിയമത്തെ എതിര്ത്തുകൊണ്ടുള്ള അക്രമസംഭവങ്ങള്ക്ക് കാരണമെന്ന് അദ്ദേഹം പറഞ്ഞു.
കള്ളപ്രചരണം നടത്തി മതവിദ്വേഷം വളര്ത്താനും അതുവഴി കലാപങ്ങള് സൃഷ്ടിക്കുവാനും ആണ് ഇവര് ബോധപൂര്വ്വം ശ്രമിച്ചുകൊണ്ടിരിക്കുന്നത്. അതിനാല് സത്യാവസ്ഥ സമൂഹത്തെ ബോധിപ്പിക്കാനാണ് ദേശീയ പൗരത്വ ഭേദഗതി നിയമത്തിന് ഐക്യദാര്ഢ്യം പ്രകടിപ്പിച്ച് റാലി സംഘടിപ്പിച്ചതെന്നും അദ്ദേഹം കൂട്ടിച്ചേര്ത്തു. ജില്ലാ പ്രസിഡന്റ് അമല് മനോജ് അധ്യക്ഷനായി. എബിവിപി സംസ്ഥാന സമിതി അംഗം അഞ്ജലി, എബിവിപി സംസ്ഥാന പ്രവര്ത്തക സമിതി അംഗം കെ.വി. രജീഷ് എന്നിവര് സംസാരിച്ചു. കോഴിക്കോട് ജില്ലാ സെക്രട്ടറി ശ്യാം ശങ്കര്, സംസ്ഥാന സമിതി അംഗം അമല് ഷാജി, ജില്ലാ സമിതി അംഗങ്ങളായ വിസ്മയ പിലാശ്ശേരി, പ്രവീണ് തെഞ്ചേരി എന്നിവര് നേതൃത്വം നല്കി.
