കണ്ണൂര്: കണ്ണൂര് വി.കെ. കൃഷ്ണമേനോന് സ്മാരക വനിതാ കോളേജില് പൗരത്വ ബില്ലിന്റെ പേരില് പ്രധാനമന്ത്രി നരേന്ദ്ര മോദിയെയും ആഭ്യന്തരമന്ത്രി അമിത് ഷായെയും അവഹേളിച്ച് എസ്എഫ്ഐ സംഘം. നരേന്ദ്ര മോദിയുടെയും അമിത് ഷായുടെയും ഫോട്ടോകള് നിലത്ത് പതിപ്പിച്ച് വിദ്യാര്ഥികളെ കൊണ്ട് അതിലൂടെ നടത്തിച്ചായിരുന്നു എസ്എഫ്ഐയുടെ സമരാഭാസം.
ഇന്നലെ രാവിലെ കോളേജില് ക്ലാസ് ആരംഭിച്ച ഉടന് സംഘടിച്ചെത്തിയ എസ്എഫ്ഐ സംഘം കോളേജ് കവാടത്തിനു മുന്നില് പ്രധാനമന്ത്രി നരേന്ദ്ര മോദിയുടെയും ആഭ്യന്തരമന്ത്രി അമിത് ഷായുടെയും ചിത്രങ്ങള് നിലത്ത് പതിക്കുകയായിരുന്നു. ഇതുവഴി കടന്നു പോയ വിദ്യാര്ഥികളെക്കൊണ്ട് ചിത്രങ്ങളില് ചവിട്ടിപ്പിക്കുകയും ചെയ്തു. അവഹേളനപരമായ സംഭവം അറിഞ്ഞ് സ്ഥലത്തെത്തിയ എബിവിപി, യുവമോര്ച്ച പ്രവര്ത്തകര് ശക്തമായ പ്രതിഷേധം ഉയര്ത്തി. തുടര്ന്ന് സ്ഥലത്തെത്തിയ പോലീസ് പോസ്റ്ററുകള് പറിച്ചുമാറ്റി. എന്നാല് ഉടന്തന്നെ സ്ഥലത്തെത്തിയ എസ്എഫ്ഐക്കാര് വീണ്ടും പോസ്റ്ററുകള് പതിച്ചു.
പുറത്തുനിന്നുള്ള എസ്എഫ്ഐകാര് കൂടി സംഘടിച്ച് കോളേജിനു മുന്നില് എത്തിയതോടെ സംഘര്ഷാവസ്ഥ ഉടലെടുത്തു. കോളേജിന് മുന്നില് കുത്തിയിരുന്ന് എസ്എഫ്ഐ പ്രവര്ത്തകരും എബിവിപി, യുവമോര്ച്ച പ്രവര്ത്തകരും മുദ്രാവാക്യം വിളിച്ചു. സംഘര്ഷത്തെ തുടര്ന്ന് സ്ഥലത്തെത്തിയ പോലീസ് നിലത്ത് പതിച്ച ഫോട്ടോകള് മുഴുവന് പറിച്ചുമാറ്റി. പ്രതിഷേധത്തിന്റെ പേരില് പ്രധാനമന്ത്രിയെയും കേന്ദ്ര ആഭ്യന്തര മന്ത്രിയെയും അവഹേളിച്ചവര്ക്കെതിരെ നിയമ നടപടിയുമായി മുന്നോട്ട് പോകാനാണ് യുവമോര്ച്ച തീരുമാനമെന്ന് ജില്ലാ പ്രസിഡണ്ട് സി.സി. രതീഷ് അറിയിച്ചു.
