ലഖ്നൗ: പൗരത്വ ഭേദഗതി നിയമത്തിനെതിരെ തെരുവില് കലാപം നടത്തുന്നവര് ന്യൂസ് 18 നെറ്റ് വര്ക്കിന്റെ ഒബി വാന് കത്തിച്ചു. വാര്ത്ത റിപ്പോര്ട്ട് ചെയ്യാനെത്തിയ വാഹനം തടഞ്ഞുവെച്ചാണ് കലാപകാരികള് മാധ്യമസ്ഥാപനത്തിന്റെ വാഹനം തീയിട്ടത്. വാഹനത്തിലുള്ള മാധ്യമ പ്രവര്ത്തകര് കലാപകാരികളില് നിന്ന് രക്ഷപ്പെട്ടത് തലനാരിഴയ്ക്കാണ്. ഉത്തര് പ്രദേശിന്റെ പലയിടത്തും പൗരത്വ ഭേദഗതിക്കെതിരെ അക്രമികള് വ്യാപകമായി അക്രമം അഴിച്ചുവിടുകയാണ്.
അതേസമയം, അക്രമം അഴിച്ചുവിടുന്നവര്ക്കെതിരെയും പൊതുസ്വത്തുകള് നശിപ്പിക്കുന്നവര്ക്കുമെതിരെ കടുത്ത നടപടി സ്വീകരിക്കുമെന്ന് ഉത്തര്പ്രദേശ് സര്ക്കാര് വ്യക്തമാക്കി. പ്രതിഷേധത്തിന്റെ പേരില് കലാപം നടത്തരുന്നതെന്നും അക്രമികള്ക്കെതിരെ കര്ശന നടപടി സ്വീകരിക്കുമെന്ന് മുഖ്യമന്ത്രി യോഗി ആദിത്യനാഥ് പറഞ്ഞു.
അക്രമസംഭവങ്ങളില് കുറ്റക്കാരെന്ന് കണ്ടെത്തുന്നവരുടെ സ്വത്തുക്കള് കണ്ടുകെട്ടുമെന്നും പൊതുമുതല് നശിപ്പിച്ചതിന്റെ നഷ്ടം ഇവരുടെ കൈയില് നിന്നു തന്നെ ഈടാക്കുമെന്നും യു.പി. മുഖ്യമന്ത്രി വ്യക്തമാക്കി. പൗരത്വ ഭേദഗതി നിയമത്തിനെതിരായ പ്രതിഷേധങ്ങള്ക്കിടെ യു.പി.യിലെ പലയിടങ്ങളിലും സംഘര്ഷം രൂക്ഷമായിരുന്നു. അതിനിടെ ലക്നൗവില് കലാപം നടത്തിയ 40 പേരെ പോലീസ് പിടികൂടി. 50 പേരെ കരുതല് തടങ്കലില് പാര്പ്പിച്ചിട്ടുണ്ടെന്ന് ലക്നൗ എസ്എസ്പി കലാനിധി നൈധിനി പറഞ്ഞു. ഉത്തര്പ്രദേശിലെ ഹസ്രത് ഗഞ്ചിലാണ് വ്യാപകമായി കലാപകാരികള് ആക്രമണം നടത്തുന്നത്. ഹസ്രത് ഗഞ്ചില് നിലവില് സ്ഥിതിഗതികള് നിയന്ത്രണ വിധേയമാണെന്നും അദ്ദേഹം വ്യക്തമാക്കി.
പ്രദേശത്ത് ആയിരക്കണക്കിന് ആളുകളാണ് ആക്രമണം നടത്തുന്നത്. നിരവധി വീടുകള് കലാപകാരികള് അടിച്ചു തകര്ത്തിട്ടുണ്ട്. മാദ്ധ്യമ പ്രവര്ത്തകരുടെ വാഹനങ്ങള് ഉള്പ്പെടയുള്ള വാഹനങ്ങള് ഇവര് അഗ്നിക്കിരയാക്കി. കലാപകാരികളെ ഭയന്ന് സാധാരണ ജനങ്ങള് വീടുകള്ക്കകത്തു തന്നെ കഴിയുന്ന അവസ്ഥയാണ് പ്രദേശത്ത് നിലവില് ഉളളത്. വ്യാപക ആക്രമണങ്ങള് നടക്കുന്ന സാഹചര്യത്തില് ഉത്തര്പ്രദേശിലെ വിവിധയിടങ്ങളില് നിരോധനാജ്ഞ പ്രഖ്യാപിച്ചിരിക്കുകയാണ്.
