തിരുവനന്തപുരം: പൊതുഭരണ വകുപ്പ് മുന് സെക്രട്ടറിയും മുതിര്ന്ന ഐഎഎസ് ഉദ്യോഗസ്ഥനുമായ ബിശ്വനാഥ് സിന്ഹ അവധി അപേക്ഷ നല്കി. കീഴുദ്യോഗസ്ഥയുടെ പരാതിയെ തുടര്ന്നാണ് അവധിയില് പ്രവേശിച്ചതെന്നാണ് വിവരം. മൂന്ന് മാസത്തെ അവധിക്കാണ് സിന്ഹ അപേക്ഷ നല്കിയത്. അവധി അപേക്ഷ ചീഫ് സെക്രട്ടറിക്ക് നല്കുന്നതിന് പകരം മുഖ്യമന്ത്രിയുടെ ഓഫീസിലേക്ക് നേരിട്ട് അയയ്ക്കുകയായിരുന്നു. തിങ്കളാഴ്ച മുതല് അവധി പ്രാബല്യത്തില് വരും.
തനിക്കെതിരെ ജൂനിയര് വനിതാ ഐഎഎസുകാര് നല്കിയ പരാതി ആരോപണങ്ങള് കെട്ടിച്ചമച്ചതാണെന്നാണ് അവധി അപേക്ഷയില് സിന്ഹ സൂചിപ്പിച്ചിട്ടുള്ളത്. തനിക്കെതിരെ ഉയര്ന്ന ആരോപണങ്ങള്ക്ക് പിന്നില് ഗൂഢാലോചനയുണ്ടെന്നും അപേക്ഷയിലുണ്ട്. വനിതാ ഐഎഎസുകാര് പരാതി ഉന്നയിച്ചതിനു പിന്നാലെ കഴിഞ്ഞ മന്ത്രിസഭായോഗത്തില് പൊതുഭരണ വകുപ്പില് നിന്നും അപ്രധാന വകുപ്പിലേക്ക് സിന്ഹയെ സ്ഥലം മാറ്റിയിരുന്നു. എന്നാല് സര്ക്കാരിന്റെ ആവശ്യപ്രകാരമല്ല ബിശ്വനാഥ് സിന്ഹ അവധിക്ക് അപേക്ഷ നല്കിയതെന്ന് മുഖ്യമന്ത്രിയുടെ ഓഫീസ് അറിയിച്ചു.
അതേസമയം സെക്രട്ടേറിയറ്റില് സിപിഎം അനുകൂല സംഘടനയായ സെക്രട്ടേറിയറ്റ് എംപ്ലോയീസ് അസോസിയേഷനുമായുള്ള ഏറ്റുമുട്ടലാണ് സ്ഥലം മാറ്റത്തിന് പിന്നിലെന്നാണ് ഐഎഎസ് വൃത്തങ്ങള് പറയുന്നത്. സെക്രട്ടേറിയറ്റില് പഞ്ചിങ് ഏര്പ്പെടുത്തി, പഞ്ചിങ് ശമ്പള സോഫ്റ്റ്വെയറായ സ്പാര്ക്കുമായി ബന്ധിപ്പിച്ചു, അവിഹിതമായി നേടിയ യാത്രാ ബത്ത സംഘടനാ നേതാവിനെക്കൊണ്ട് തിരിച്ചടപ്പിച്ചു, നേതാവിനെ സസ്പെന്ഡ് ചെയ്തു, ജോലി ചെയ്യാതെ കറങ്ങിനടന്നവരെ പിടിക്കാനുള്ള സംവിധാനം തുടങ്ങിയ പരിഷ്കാരങ്ങള് സിന്ഹ നടപ്പിലാക്കി. ഇതോടെയാണ് സിന്ഹയെ മാറ്റണമെന്ന ആവശ്യവുമായി സിപിഎം സംഘടന രംഗത്ത് വന്നതെന്നാണ് ഒരുവിഭാഗം ഐഎഎസുകാരുടെ വാദം.
