ഹൈദരാബാദ് : ക്രിസ്മസ് സമ്മാനമായി തെലങ്കാനയിലെ 200 പള്ളികള്ക്ക് ഒരുലക്ഷം രൂപ വീതം നല്കാന് സംസ്ഥാന സര്ക്കാര് തീരുമാനിച്ചു. ഇതുകൂടാതെ ഓരോ പള്ളികള്ക്കും വസ്ത്രങ്ങളും മറ്റും അടങ്ങുന്ന ഗിഫ്റ്റ് പാക്കറ്റുകളും സര്ക്കാര് നല്കാന് തീരുമാനിച്ചിട്ടുണ്ട്. ഇതുസംബന്ധിച്ച് സംസ്ഥാന സര്ക്കാര് അനുമതി നല്കിക്കഴിഞ്ഞു.
പ്രാദേശിക ഭരണകൂട സമിതി കണ്ടെത്തി നിര്ദ്ദേശിക്കുന്ന പള്ളികള്ക്കാണ് തെലങ്കാന സര്ക്കാരിന്റെ ഈ സമ്മാനങ്ങള് നല്കുന്നത്. പ്രാദേശിക ഭരണസമിതി നിര്ദ്ദേശിക്കുന്ന പള്ളികള് അവരുടെ ബാങ്ക് അക്കൗണ്ട് നമ്പറും ഐഎഫ്എസ്സി കോഡ് ഉള്പ്പടെയുള്ള വിശദ വിവരങ്ങള് നല്കിയശേഷം അതിലേക്കാകും പണം കൈമാറുക. ഒറ്റത്തവണയായിട്ടാകും പണം കൈമാറുന്നതെന്ന് ഹൈദരാബാദ് മേയര് ബോന്ദു റാംമോഹന് അറിയിച്ചു.
ഡിസംബര് അഞ്ചിനും പത്തിനുമിടയില് ഈ സമ്മാനങ്ങള് അയച്ചു നല്കിത്തുടങ്ങുന്നതാണ്. കൂടാതെ ഡിസംബര് 19ന് ക്രിസ്മസ് ഫെസ്റ്റ് സംഘടിപ്പിക്കുമെന്നും അധികൃതര് അറിയിച്ചു.
