മലപ്പുറം: കോളേജ് അധ്യാപികയെ വിവാഹ വാഗ്ദാനം നല്കി പീഡിപ്പിച്ചതായി പരാതി. രഹസ്യമായി പകര്ത്തിയ യുവതിയുടെ നഗ്നചിത്രങ്ങളും ഫോണ് നമ്പര് ഉള്പ്പടെയുള്ള വിവരങ്ങളും പ്രതി സമൂഹമാധ്യമങ്ങളിലൂടെ പ്രചരിപ്പിച്ചു. കുറ്റിപ്പുറം കോളേജിലെ അധ്യാപികയായ യുവതിയാണ് പൊന്നാനി സ്വദേശിയും മുമ്പ് അധ്യാപകനുമായിരുന്ന മുഹമ്മദ് ഹാഫിസിനെതിരെ പരാതിയുമായി രംഗത്തെത്തിയത്.
നഗ്നചിത്രങ്ങള് കാണിച്ച് ഭീഷണിപ്പെടുത്തി യുവതിയെ മതംമാറ്റാനായിരുന്നു ഇയാളുടെ ലക്ഷ്യമെന്ന് സംശയിക്കുന്നു. മതംമാറാന് യുവതി വിസമ്മതിച്ചതിന്റെ ദേഷ്യത്തിലാണ് ചിത്രങ്ങളടക്കം സമൂഹമാധ്യമങ്ങളില് പ്രചരിപ്പിച്ചത്. ചിത്രങ്ങള് പ്രചരിച്ചതോടെ നിരവധി അശ്ലീല ഫോണ് കോളുകളും സന്ദേശങ്ങളുമാണ് യുവതിക്ക് ലഭിക്കുന്നത്. ഇതോടെ തനിക്ക് പുറത്തിറങ്ങാന് പറ്റാത്ത അവസ്ഥയാണെന്ന് യുവതി പറയുന്നു.
പരാതി നല്കിയെങ്കിലും അനുകൂല സമീപനമല്ല കുറ്റിപ്പുറം പോലീസിന്റെ ഭാഗത്ത് നിന്നുണ്ടായത്. സംഭവത്തിനു ശേഷം വിദേശത്തേക്ക് കടന്ന പ്രതി ഇപ്പോള് അജ്മാനിലെ വസ്ത്ര നിര്മാണ യൂണിറ്റിലെ അഡ്മിനിസ്ട്രേഷന് മാനേജരാണ്. ഇരയുടെ മരണശേഷം മാത്രമെ ഇയാളെ നാട്ടിലെത്തിച്ച് അറസ്റ്റ് ചെയ്യാനാകൂയെന്ന വിചിത്ര ന്യായമാണ് പോലീസ് പറയുന്നത്. ഇതിനെതിരെ യുവതി മലപ്പുറം എസ്പിക്ക് പരാതി നല്കി.
