പത്തനംതിട്ട : ശബരിമല റോഡുകളുടെ പണികള് മണ്ഡല കാലത്തിന് മുമ്പേ പൂര്ത്തിയാകില്ലെന്ന് കേരള ഗവണ്മെന്റ് കോണ്ട്രാക്ടേഴ്സ് അസ്സോസിയേഷന് ഭാരവാഹികള് പത്രസമ്മേളനത്തില് പറഞ്ഞു. ഭരണാനുമതി നല്കുന്നതിലും, ടെന്ഡറുകള് വിളിക്കുന്നതിലും ഉണ്ടായ കാലതാമസവും ടാറിന്റെ വകുപ്പു തല വിതരണം നിര്ത്തിയതുമാണ് ശബരിമല റോഡുകളുടെ അറ്റകുറ്റപ്പണികള് വൈകാനിടയാക്കുന്നത്.
മണ്ഡല കാലം ആരംഭിയ്ക്കുന്ന നവംബര് 17 ന് ഒരു റോഡു പോലും പൂര്ത്തിയാകില്ല. 48 കോടി രൂപയ്ക്കുള്ള 11 പണികള് സൂപ്രണ്ടിംഗ് എന്ജീനിയറുടെ കാര്യാലയത്തില് ടെന്ഡര് ചെയ്തെങ്കിലും പൂര്ത്തിയാക്കാന് കഴിയാത്ത സ്ഥിതിയിലാണ്. ശബരിമല റോഡുകളുടെ പുനരുദ്ധാരണം പൂര്ത്തീകരിക്കാനാവത്തതിനെക്കുറിച്ച് പൊതുമരാമത്ത് മന്ത്രി അന്വേഷിക്കണം. പൊതുമരാമത്ത് റോഡുകളുടെ സംസ്ഥാനതല അറ്റകുറ്റ പണികള് ഡിസം ബര് 31-നു മുമ്പും തദ്ദേശ സ്വയംഭരണ വകുപ്പിന്റേത് ജനുവരി 31നു മുമ്പും പൂര്ത്തീകരിക്കണമെന്ന ഹൈക്കോടതിയുടെ ഉത്തരവ് പ്രായോഗികമല്ല. ടെന്ഡര് വിളിച്ച് പണികള് ക്രമീകരിക്കുന്നതിനും നിര്മ്മാണ വസ്തുക്കളും മെഷിനറികളും ശേഖരിച്ച് അവ പൂര്ത്തിയാക്കാനും സ്വാഭാവിക സമയക്രമം ആവശ്യമാണ്. വകുപ്പുകളുടെ നടപടിക്രമങ്ങളും പാലിക്കണം.
റോഡുകളുടെ അറ്റകുറ്റപ്പണികള്ക്ക് ആവശ്യമായ മുഴുവന് ടാറും വകുപ്പുതലത്തില് ഉടന് വിതരണം ചെയ്യണം. ചെറുകിട ക്വാറികള്ക്ക് പ്രവര്ത്തനാനുമതി നല്കണം. കുടിശ്ശികകളുടെ 50 ശതമാനമെങ്കിലും നവംബര്, ഡിസംബര് മാസങ്ങളില് വിതരണം ചെയ്യണം. വിവിധ വകുപ്പുകളില് നിന്ന് സംസ്ഥാനത്തെ കരാറുകാര്ക്ക് 3000കോടി രൂപ കുടിശ്ശിക ലഭിക്കാനുണ്ട്. ഇപ്പോള് അഞ്ച് ലക്ഷത്തിനു മുകളിലുള്ള ചെക്കുകള് ട്രഷറിയില് നിന്ന് മാറിക്കിട്ടുന്നില്ല.
പണികള് പൂര്ത്തിയാക്കുന്ന കാലപരിധി നീട്ടി നല്കണമെന്നും ടാര്, ക്വാറി ഉല്പന്നങ്ങള്, കുടിശ്ശിക തുക എന്നിവ ലഭ്യമാക്കാന് സര്ക്കാരിനോട് നിര്ദ്ദേശിക്കണമെന്നും ആവശ്യപ്പെട്ട് അസോസിയേഷന് ഹൈക്കോടതിയില് പ്രത്യേക ഹര്ജി നല്കും. പത്രസമ്മേളനത്തില് കെജിസിഎ സംസ്ഥാന പ്രസിഡന്റ് വര്ഗീസ് കണ്ണമ്പള്ളി, സെക്രട്ടറി തോമസുകുട്ടി തേവരുമുറിയില്, പത്തനംതിട്ട ജില്ലാ പ്രസിഡന്റ് അനില് ഉഴത്തില്, കോട്ടയം ജില്ലാ പ്രസിഡന്റ്, റെജി .ടി ചാക്കോ, സംസ്ഥാന സെക്രട്ടറിയേറ്റ് മെമ്പര് എന്.പി. ഗോപാലകൃഷ്ണന്, ജില്ലാ സെക്രട്ടറി അജികുമാര് എന്നിവര് സംബന്ധിച്ചു.
