ന്യൂയോര്ക്ക്: 2050 തോടെ കേരളത്തിന്റെ ഭൂപടം മാറുമെന്ന് പഠനറിപ്പോര്ട്ട്. കേരളത്തിലെ പലപ്രദേശങ്ങളും വെള്ളത്തിനടിയിലാകും. 2035ല് തന്നെ ഇതിന്റെ ലക്ഷണങ്ങള് കണ്ടുതുടങ്ങുമെന്ന് പഠന റിപ്പോര്ട്ടില് പറയുന്നു. യുഎസില് പ്രവര്ത്തിക്കുന്ന ക്ലൈമറ്റ് സെന്ട്രല് എന്ന സ്ഥാപനം നടത്തിയ പഠനത്തിലാണ് ഇതു പറയുന്നത്. ഗവേഷണ മാസികയായ നേച്വര് കമ്യൂണിക്കേഷന്സില് പഠനം പ്രസിദ്ധീകരിച്ചു. ശാസ്ത്രജ്ഞരും ശാസ്ത്ര വാര്ത്താലേഖകരും ഉള്പ്പെട്ടതാണ് ക്ലൈമറ്റ് സെന്ട്രലിനു രൂപം നല്കിയിരിക്കുന്നത്.
ബെംഗളൂരു ഇന്ത്യന് ഇന്സ്റ്റിറ്റ്യൂട്ട് ഓഫ് സയന്സിലെ അറ്റ്മോസ്ഫെറിക് ആന്ഡ് ഓഷ്യാനിക് സയന്സസ് പ്രഫസര് ഡോ. എസ്.കെ.സതീഷും ഇക്കാര്യം അറിയിച്ചിട്ടുണ്ട്. മധ്യകേരളത്തിലെ തീരപ്രദേശമാണ് ഏറ്റവും കൂടുതല് ഭീഷണി നേരിടുക. കാലാവസ്ഥാ വ്യതിയാനം, ആഗോളതാപനം എന്നിവയുടെ നിലയും ഉപഗ്രഹങ്ങളില്നിന്നുള്ള വിവരങ്ങളും വിശകലനം ചെയ്ത് ക്ലൈമറ്റ് സെന്ട്രല് രൂപപ്പെടുത്തിയ പ്രളയ ഭൂപടത്തില് ആലപ്പുഴ, കോട്ടയം, തൃശൂര്, എറണാകുളം ജില്ലകളിലെ ഒട്ടേറെ പ്രദേശങ്ങളില് സമുദ്രജലം കയറാനുള്ള സാധ്യതയാണ് ചൂണ്ടിക്കാട്ടുന്നത്. കടലോര ജില്ലകളിലെ താഴ്ന്ന പ്രദേശങ്ങള്ക്കും ഭീഷണിയുണ്ട്. 30 വര്ഷത്തിനുള്ളില് മുംബൈ, കൊല്ക്കത്ത നഗരങ്ങളുടെ ഭാഗങ്ങളും കടലിനടിയിലാകും. ആന്ധ്ര, തമിഴ്നാട്, ഒഡീഷ, ഗുജറാത്ത് സംസ്ഥാനങ്ങളുടെയും ബംഗ്ലദേശിന്റെയും തീരപ്രദേശങ്ങളും ഭീഷണിയിലാണ്.
