മുംബൈ: ബീഹാര് സ്വദേശിനി നല്കിയ പീഡനക്കേസില് ബിനോയി കോടിയേരിക്ക് തിരിച്ചടി. കേസുമായി ബന്ധപ്പെട്ട് മുംബൈ ഒഷിവാര പോലീസ് രജിസ്റ്റര് ചെയ്ത എഫ്ഐആര് റദ്ദാക്കണമെന്നാവശ്യപ്പെട്ടുള്ള ഹര്ജി പരിഗണിക്കുന്നത് കോടതി രണ്ടുവര്ഷത്തേയ്ക്ക് നീട്ടിവെച്ചു.
ഹര്ജി ഫയലില് സ്വീകരിച്ച ബോംബെ ഹൈക്കോടതി കേസ് പരിഗണിക്കുന്നത് 2021 ജൂണ് മാസത്തിലേക്ക് മാറ്റിവെയ്ക്കുകയായിരുന്നു.
ഹര്ജി ഇപ്പോള് പരിഗണിക്കുന്നത് ഡിഎന്എ പരിശോധന ഫലം ലഭിക്കാന് വൈകുമെന്ന് അന്വേഷണ ഉദ്യോഗസ്ഥന് കോടതിയില് അറിയിച്ചിരുന്നു. ഈ വാദം കണക്കിലെടുത്താണ് കോടതിയുടെ ഈ നടപടി. അതേസമയം ഡിഎന്എ പരിശോധന നടത്തുന്ന ലാബില് നേരത്തെയുള്ള ഒട്ടേറെ കേസുകളുടെ പരിശോധന നടക്കാനുണ്ടെന്നും അതിനാലാണ് ബിനോയ് കോടിയേരിയുടെ കേസിലെ ഫലം ലഭിക്കാന് താമസമുണ്ടാകുന്നതെന്നും കോടതിയില് പോലീസ് വിശദീകരണം നല്കി.
ബീഹാര് സ്വദേശിയുടെ പരാതിയില് മുംബൈ ഒഷിവാര പോലീസാണ് കേസ് രജിസ്റ്റര് ചെയ്തത്. തുടര്ന്ന് കുട്ടിയുടെ പിതൃത്വം തെളിയിക്കാന് കോടതി നിര്ദ്ദേശ പ്രകാരം ബിനോയി ഡിഎന്എ പരിശോധനയ്ക്കായി രക്തസാമ്പിള് നല്കുകയും ചെയ്തിരുന്നു. അതേസമയം ആദ്യം രക്ത സാമ്പിള് നല്കാന് വിസമ്മതിച്ച ബിനോയിക്കെതിരെ കോടതിയുടെ കര്ശ്ശന നിര്ദ്ദേശം ഉണ്ടായതിനെ തുടര്ന്നാണ് അതിനു തയ്യാറായത്.
