ലഖ്നൗ: ഉത്തര്പ്രദേശിലെ മൗവില് ഗ്യാസ് സിലിണ്ടര് പൊട്ടിത്തെറിച്ച് ഇരുനില കെട്ടിടം തകര്ന്നുവീണ് 11 പേര് മരിച്ചു. അപകടത്തില് പതിനഞ്ചോളം പേര്ക്ക് പരിക്കേറ്റു. നിരവധി പേര് കെട്ടിടാവശിഷ്ടങ്ങള്ക്കിടയില് കുടുങ്ങി കിടക്കുന്നതായാണ് വിവരം. രക്ഷാപ്രവര്ത്തനം പുരോഗമിക്കുകയാണ്. തിങ്കളാഴ്ച രാവിലെ മൗ ജില്ലയിലെ മൊഹമ്മദാബാദിലായിരുന്നു അപകടം.
പരിക്കേറ്റവരെ ആശുപത്രിയില് പ്രവേശിപ്പിച്ചു. ഇവര്ക്ക് മികച്ച ചികിത്സ നല്കണമെന്ന് മുഖ്യമന്ത്രി യോഗി ആദ്യത്യനാഥ് നിര്ദേശിച്ചിട്ടുണ്ട്. കെട്ടിടത്തിലെ ഒരു സ്ത്രീ രാവിലെ ഭക്ഷണം പാചകം ചെയ്യുന്നതിനിടെ സിലിണ്ടര് പൊട്ടിത്തെറിച്ചെന്നാണ് റിപ്പോര്ട്ട്. അഗ്നിരക്ഷാസേനയും പോലീസും നാട്ടുകാരും സംഭവസ്ഥലത്ത് രക്ഷാപ്രവര്ത്തനം തുടരുകയാണ്.
സംഭവത്തില് മുഖ്യമന്ത്രി യോഗി ആദിത്യനാഥ് അനുശോചനം രേഖപ്പെടുത്തി.
