ന്യൂദല്ഹി : പാക് ഭീകരതയ്ക്കെതിരയുള്ള കേന്ദ്ര സര്ക്കാരിന്റെ കര്ക്കശ നിലപാട് മൂലം രാജ്യത്തെ കോണ്ഗ്രസ് നേതാക്കളെ പരസ്യമായി കൂട്ടുപിടിച്ച് പാക്കിസ്ഥാന്. കര്താര്പൂര് ഇടനാഴിയുടെ ഉദ്ഘാടന കര്മ്മത്തിലേക്ക് മുന് പ്രധാനമന്ത്രിയും കോണ്ഗ്രസ് നേതാവുമായ മന് മോഹന് സിങ്ങിനെ മാത്രം ക്ഷണിച്ചുകൊണ്ടാണ് പാക്കിസ്ഥാന് ഇക്കാര്യം വ്യക്തമാക്കിയിരിക്കുന്നത്. എന്നാല്, പാക്കിസ്ഥാന്റെ ക്ഷണത്തില് ഒന്നും മിണ്ടാന് ഇതു വരെ കോണ്ഗ്രസ് ദേശീയ നേതൃത്വം തയാറായിട്ടില്ല.
പുല്വാമ ഭീകരാക്രമണത്തിന്റെ പശ്ചാത്തലത്തില് തന്നെ ഇന്ത്യ- പാക് ബന്ധത്തില് വിള്ളല് വീണതാണ്. അതിനുശേഷം കശ്മീരിന്റെ പ്രത്യേക പദവി റദ്ദാക്കിയതോടെ പാക്കിസ്ഥാന് പല തവണ വിഷയത്തില് അന്താരാഷ്ട്ര ശ്രദ്ധ കൊണ്ടുവരാന് ശ്രമിച്ചിരുന്നു. അടുത്തിടെ നടന്ന യുഎന് സമ്മേളനത്തില് പോലും വിഷയം അവതരിപ്പിച്ചെങ്കിലും ഇന്ത്യയുടെ ആഭ്യന്തര കാര്യം എന്ന് ചൂണ്ടിക്കാട്ടി ലോക രാഷ്ട്രങ്ങള് പാക്കിസ്ഥാനെ കൈ ഒഴിയുകയാണ് ചെയ്തത്. ഇതില് പല തവണ കോണ്ഗ്രസ് നേതാവ് രാഹുല്ഗാന്ധി ഉള്പ്പടെയുള്ളവരുടെ ട്വീറ്റും പ്രസംഗങ്ങളും ചൂണ്ടിക്കാട്ടിയാണ് കശ്മീര് വിഷയം പാക്കിസ്ഥാന് ലോക രാഷ്ട്രങ്ങള്ക്കു മുന്നില് അവതരിപ്പിച്ചത്.
പ്രധാനമന്ത്രിയടക്കുമുള്ള കേന്ദ്രമന്ത്രിമാര് കശ്മീര് ഇന്ത്യയുടെ അവിഭാജ്യ ഘടകമാണെന്നും അതില് മറ്റ് രാജ്യങ്ങള് ഇടപെടേണ്ടെന്ന കര്ശ്ശന നിലപാട് എടുത്തതോടെയാണ് പാക് ഭരണകൂടത്തിന്റെ ഈ കോണ്ഗ്രസ് പ്രേമം. കൂടാതെ പാക് മണ്ണിലെ ഭീകരത അവസാനിപ്പിക്കാതെ ചര്ച്ചയ്ക്കില്ലെന്നും ഇന്ത്യ താക്കീത് നല്കി.അതേസമയം മന്മോഹന് സിങ് സിഖ് സമുദായത്തില്പെട്ട വ്യക്തി ആയതിനാലാണ് ഇദ്ദേഹത്തെ ക്ഷണിക്കുന്നതെന്നാണ് പാക്കിസ്ഥാന്റെ ന്യായീകരണം. സമൂദായത്തെ പ്രതിനിധിയും മുന് പ്രധാനമന്ത്രി എന്ന നിലയിലുമാണ് അദ്ദേഹത്തിനെ ചടങ്ങിലേക്ക് ക്ഷണിക്കുന്നതെന്ന് പാക് വിദേശകാര്യ മന്ത്രി ഷാ മുഹമ്മദ് ഖുറേഷി അറിയിച്ചു. നവംബര് ഒമ്പതിനാണ് ഇടനാഴിയുടെ ഉദ്ഘാടനം. അന്നുതല് കര്താര്പൂര് സാഹിബിന്റെ വിശുദ്ധ സ്ഥലം സന്ദര്ശിക്കാന് ഇന്ത്യയില് നിന്നുള്ള സിഖ് വിശ്വാസികള്ക്ക് അനുമതി നല്കുമെന്ന് പാക്കിസ്ഥാന് പ്രഖ്യാപനം നടത്തിയിട്ടുണ്ട്. ലാഹോറില് നിന്നും 125 കിലോമീറ്റര് ദൂരത്തിലാണ് കര്താര്പൂര് ഇടനാഴി.
പഞ്ചാബ് ഗുര്ദാസ്പുരിലെ ദേരാ ബാബ നാനക് ക്ഷേത്രവും കര്താര്പുര് ദര്ബാര് സാഹിബ് ഇടനാഴിയും തമ്മില് ബന്ധിപ്പിക്കുന്നതാണ് ഈ ഇടനാഴി. ഉദ്ഘാടന ദിവസം ഭരണകക്ഷി- പ്രതിപക്ഷ നേതാക്കളുടെ പ്രിതിനിധി സംഘത്തോടൊപ്പം പങ്കെടുക്കുമെന്ന് പഞ്ചാബ് മുഖ്യമന്ത്രിയും അറിയിച്ചിട്ടുണ്ട്. പഞ്ചാബിലെ 117 എംഎല്എ മാരും ചടങ്ങില് പങ്കെടുക്കുമെന്നും വ്യക്തമാക്കി കഴിഞ്ഞു. സന്ത് സമാജ് പ്രതിനിധികള്, ലോക്സഭാ, രാജ്യസഭാ എംപിമാരും എസ്എന്ജിപിസി അംഗങ്ങളും ചടങ്ങില് പങ്കെടുക്കും. ഗുരുനാനക് അവസാന കാലം ചെലവഴിച്ച പാക്കിസ്ഥാനിലെ ഗുരുദ്വാര ദര്ബാര് സാഹിബിലേക്കുള്ളതാണ് ഈ ഇടനാഴി. മൂന്ന് കിലോമീറ്റര് ദൂരമുള്ള ഇത് യാഥാര്ത്ഥ്യമാകുന്നതോടെ ഇന്ത്യയിലെ സിക്ക് മതവിശ്വാസികള്ക്ക് ഗുരുദ്വാര ദര്ബാര് സാഹിബ് സന്ദര്ശിക്കാന് വഴിയൊരുക്കും.
