ന്യൂദല്ഹി: ഐക്യരാഷ്ട്ര സഭയില് ഇന്ത്യയുടെ നിലപാടുകള് ശക്തമായി അവതരിപ്പിച്ച പ്രധാനമന്ത്രിക്ക് പിന്തുണയുമായി കോണ്ഗ്രസ്. ജമ്മു കശ്മീര് പ്രത്യേക പദവി എടുത്തുകളഞ്ഞതിന് ശേഷം പാക്കിസ്ഥാന് നടത്തുന്ന പ്രകോപനങ്ങളെ ഐക്യരാഷ്ട്രസഭയിലെ നിലപാടുകള് കൊണ്ട് ഇന്ത്യയ്ക്ക് ചെറുക്കാനായി. ജമ്മുകശ്മീരില് മറ്റൊരു രാജ്യത്തിന്റെ മധ്യസ്ഥത ആവശ്യമില്ലെന്ന നിലപാട് ആവര്ത്തിച്ച പ്രധാനമന്ത്രി മോദിയെ കോണ്ഗ്രസ് അഭിനന്ദിച്ചു. പാക്ക് പ്രധാനമന്ത്രി ഇമ്രാന് ഖാന്റെ പ്രസ്താവനയെ പാര്ട്ടി അപലപിച്ചു.
ലോകരാജ്യങ്ങളെ തെറ്റിദ്ധരിപ്പിക്കാനുള്ള നീക്കത്തിന്റെ ഭാഗമായി പാക്കിസ്ഥാന് എപ്പോഴും കളവു മാത്രം പറയുകയാണ്. യുഎന് അസംബ്ലിയില് കശ്മീര് വിഷയം ഉന്നയിച്ച് പാക്കിസ്ഥാന് പ്രധാനമന്ത്രി ഇമ്രാന് ഖാന് നടത്തിയ പ്രസംഗത്തിന് ചുട്ട മറുപടിയുമായാണ് ഇന്ത്യ രംഗത്തെത്തിയത്. ഇന്ത്യന് വിദേശകാര്യ സെക്രട്ടറി വിദിഷ മൈത്രയാണ് പാക്കിസ്ഥാന് ഭരണാധികാരികളുടെ വായടിപ്പിക്കുന്ന ചോദ്യങ്ങളുമായി യുഎന് ജനറല് അസംബ്ലിയില് ആഞ്ഞടിച്ചത്. ഭീകരര്ക്ക് പെന്ഷന് നല്കുന്ന ഏകരാജ്യമല്ലേ പാക്കിസ്ഥാന് എന്ന് വിദിഷ പ്രസംഗത്തില് ചോദിച്ചു. യുഎന് പട്ടികയിലുള്ള 130 ഭീകരര് പാക്കിസ്ഥാനില് ഇല്ലെന്ന് ഇമ്രാന് ഖാന് ഉറപ്പു നല്കാനാകുമോ എന്നും വിദിഷ. യുഎന് ജനറല് അസംബ്ലിയില് ഇംറാന് ഖാന്റെ പ്രസംഗത്തിന് മറുപടി നല്കുകയായിരുന്നു വിദേശകാര്യ മന്ത്രാലയം സെക്രട്ടറി. ഇതോടെ സോഷ്യല് മീഡിയയില് അടക്കം താരമായി മാറിയിരിക്കുയാണ് ഇന്ത്യയുടെ മിടുക്കി ഉദ്യോഗസ്ഥ വിദിഷ മൈത്ര.
