കോട്ടയം: മസ്ജിദിനുള്ളില് നോട്ടീസ് വിതരണം ചെയ്യാന് ശ്രമിച്ച എസ്.ഡി.പിഐ പ്രവര്ത്തകരെ തടഞ്ഞ ഇമാമിനെ ക്രൂരമായി മര്ദ്ദിച്ചു. തലയോലപ്പറമ്പ് ടൗണിലെ മസ്ജിദിനുള്ളില് ഇന്നു വൈകിട്ടാണ് സംഭവം. പള്ളിയുടെ അധികാര തര്ക്കത്തെ തുടര്ന്നുള്ള സംഭവങ്ങളാണ് ഇന്ന് സംഘര്ഷത്തില് കലാശിച്ചത്. പള്ളിക്കുള്ളില് കയറി നോട്ടീസുകള് വിതരണം ചെയ്യാന് എസ്.ഡി.പി.ഐ പ്രവര്ത്തകര് എത്തുകയും ഇത് അനുവദിക്കില്ലെന്ന് ഇമാം നിലപാട് എടുക്കുകയുമായിരുന്നു.
തുടര്ന്ന് അക്രമാസക്തരായ എസ്.ഡി.പി.ഐ പ്രവര്ത്തകര് പള്ളിയിലുള്ളവരെ വെല്ലുവിളിക്കുകയായിരുന്നു. ഇവരോട് ഇറങ്ങിപ്പോകാന് ഇമാം ആവശ്യപ്പെട്ടതോടെയാണ് ആക്രമണം ഉണ്ടായതെന്ന് തലയോലപ്പറമ്പ് പോലീസ് ജന്മഭൂമിയോട് പറഞ്ഞു. തീവ്രസ്വഭാവമുള്ള ലഘുലേഖകളുമായാണ് എസ്.ഡി.പി.ഐക്കാര് പള്ളിയില് എത്തിയതെന്ന് വിശ്വാസികള് പറഞ്ഞു. ഇതു തടയാനാണ് ഇമാം ശ്രമിച്ചത്. ഇതിനെ തുടര്ന്നാണ് ക്രൂരമായ മര്ദ്ദനം ഉണ്ടായതെന്ന് ദൃസാക്ഷികള് പറഞ്ഞു. പരുക്കേറ്റ ഇമാമിനെ ആശുപത്രിയില് പ്രവേശിപ്പിച്ചു. അക്രമികളായ നാല് എസ്.ഡി.പി.ഐ പ്രവര്ത്തകര്ക്കെതിരെ കേസ് എടുത്തിട്ടുണ്ടെന്ന് പോലീസ് പറഞ്ഞു.
