തിരുവനന്തപുരം: അക്ഷയശ്രീ പ്രവര്ത്തനത്തിലൂടെ ഉടലെടുക്കുന്ന സ്വാര്ത്ഥതയില്ലാത്ത സ്ത്രീശക്തി ഭാരതത്തിന്റെ ശക്തിയായി മാറണമെന്ന് മഹിളാമോര്ച്ച സംസ്ഥാന അധ്യക്ഷ പ്രൊഫ. വി.ടി. രമ പറഞ്ഞു. ആനയറയില് അക്ഷയശ്രീ കടകംപളളി ഫെഡറേഷന്റെ വാര്ഷികാഘോഷചടങ്ങില് സംസാരിക്കുകയായിരുന്നു.
ഐക്യമത്യം മഹാബലം എന്ന ആപ്തവാക്യമാണ് അക്ഷയശ്രീയില് പ്രവര്ത്തിക്കുന്ന ഓരോ സ്ത്രീയിലും ഉണ്ടാകേണ്ടത്. സ്വാശ്രയപരമായി സ്ത്രീകള് ഉയര്ന്നാല് മാത്രമേ കുടുംബത്തിന്റെ ബുദ്ധിമുട്ടുകള്ക്ക് പങ്കാളിയാകാനും രാജ്യത്തിന്റെ പുരോഗതിക്കു വേണ്ടി പ്രവര്ത്തിക്കാനും കഴിയുകയുളളൂ. വരുമാനമുണ്ടാകുമ്പോള് സ്ത്രീകളുടെ സ്വാഭിമാനം ഉയരും. അവിടെയാണ് സ്ത്രീശക്തിയുടെ വളര്ച്ച. സമൂഹത്തിന്റെ കണ്ണുനീരൊപ്പാന് സഹായംചെയ്ത് പങ്കാളിയാകുന്നതോടെ ലക്ഷ്മി ദേവീയായും അനീതിക്കെതിരെ പോരാടാന് ദുര്ഗയായും അറിവ് പകര്ന്ന് നല്കുന്നതിലൂടെ സരസ്വതി ദേവിയാകാനും ഓരോ സ്ത്രീക്കും കഴിയും. സാമൂഹികപശ്ചാത്തലങ്ങളെ അടുത്തറിഞ്ഞുളള അക്ഷയശ്രീ പ്രവര്ത്തനം ദൈവീകശക്തിയുടെ പ്രതീകമാണെന്നും വി.ടി. രമ പറഞ്ഞു.
ആനയറ എല്പി സ്കൂളില് കടകംപളളി ഫെഡറേഷന് പ്രസിഡന്റ് ജയാരാജീവിന്റെ അധ്യക്ഷതയില് നടന്ന ചടങ്ങ് ഫെഡറേഷന് വര്ക്കിംഗ് പ്രസിഡന്റ് കാലടി വിജയകുമാര് ഉദ്ഘാടനം ചെയ്തു. ചടങ്ങില് നിര്ധന രോഗികള്ക്കുളള ചികിത്സാ സഹായവും എസ്എസ്എല്സി, പ്ലസ്ടു പരീക്ഷകളില് ഉന്നത മാര്ക്ക് നേടിയ വിദ്യാര്ഥികളെ ആദരിക്കലും അഞ്ഞൂറോളം പേര്ക്ക് ഓണക്കിറ്റും വിതരണം ചെയ്തു. കൂടാതെ അക്ഷയശ്രീ കടകംപളളി ഫെഡറേഷന്റെ പ്രവര്ത്തനത്തെ ആസ്പദമാക്കിയുളള ആല്ബത്തിന്റെ പ്രകാശനവും സീരിയല് നടി രാജലക്ഷ്മി നിര്വഹിച്ചു. ആര്എസ്എസ് വിഭാഗ് സഹകാര്യവാഹ് ആര്.എസ്. ബിജു, സഹകാര്ഭാരതി ജില്ലാ സെക്രട്ടറി എസ്. ശ്രീകണ്ഠന്, താലൂക്ക് കോര്ഡിനേറ്റര് സതീഷ് കുമാര്, കടകംപളളി ഫെഡറേഷന് വൈസ് പ്രസിഡന്റ് ഉദയറാണി, സെക്രട്ടറി എസ്. മണിക്കുട്ടന്, ജോയിന്റ് സെക്രട്ടറി ഷീജ, ബിജെപി ഏരിയാ സെക്രട്ടറി സുരേഷ്, കൗണ്സിലര് ഹിമസിജി, കവിത സുബാഷ് എന്നിവര് സംസാരിച്ചു.
